بەرگریکارێکی چێڵسی پێشکەشی بارسێلۆنا دەکرێت

یاریگا –

بەرگریکارێکی پرێمەرلیگ بۆ چارەسەرکردنی کێشەکانی هێڵی بەرگریی بارسێلۆنا پێشنیاز دەکرێت.

وێسلی فۆفانا وەکوو بژاردەیەکی بەهێزکردنی هێڵی بەرگری پێشکەشی یانەی بارسێلۆنا کراوە. پێشبینی دەکرێت یاریزانە فەرەنسییەکە، کە دەتوانێت وەکوو دڵی بەرگری و بەرگریکاری باڵی راست یاری بکات، ئەم هاوینە چێڵسی جێبهێڵێت.

بەگوێرەی سکای سپۆرتس، بریکارەکانی فۆفانا پێشتر گفتوگۆیان لەگەڵ دیکۆ کردووە بۆ لێکۆڵینەوە لە ئەگەری گواستنەوەی. چێڵسی ئامادەیە رێگەی پێبدات بڕوات، بەتایبەتی دوای ئەوەی نەیتوانی سەربکەوێت بۆ خولی یانە پاڵەوانەکانی ئەوروپا.

چێڵسی پێی باشە بە شێوەیەکی هەمیشەیی و بەرامبەر نزیکەی 30 ملیۆن یۆرۆ بیفرۆشێت، بەڵام بارسا تەنیا لەو حاڵەتەدا ئارەزووی دەکات کە گرێبەستەکە بە شێوەی خواستن و بژاردەی کڕینەوەی بێت. فۆفانا لە ئامانجە لەپێشینەکان نییە، بەڵام یانەکە زانیاری کۆدەکاتەوە بۆ ئەوەی ئەگەر بووە جێگرەوەیەکی گونجاو، هەنگاوی بۆ بنێن.

فۆفانای تەمەن 25 ساڵ، سەرەڕای کێشەکانی چێڵسی، لەم وەرزە زیاتر لە 30 یاریی کردووە. لە کاتێکدا نرخی نزیکەی 30 ملیۆن یۆرۆیە، بەڵام گواستنەوە بە شێوەی خواستن ئەگەرێکی بەهێزە و چەندین یانەی ئیتاڵیش ئارەزووی خۆیان نیشانداوە.