بە کریستیانۆ رۆناڵدۆی لاوی دەچوێنێت؛ هێنری سەرسامی یامالە

یاریگا –

تیێری هێنری دوای ئاستە بەرزەکەی ئەستێرە لاوەکەم  سەرەڕای دوورخرانەوەی بارسێلۆنا بەرامبەر ئاتلێتیکۆ مەدرید جارێکی دیکە ستایشی لامین یامالی کرد.

خاوەن درێسی ژمارە 10ـی بارسێلۆنا نمایشێکی ناوازەی لە میترۆپۆلیتانۆ پێشکەش کرد؛ گۆڵێکی کرد، بەردەوام مەترسی دروست دەکرد و کاریگەرترین یاریزانی تیمەکە بوو تاوەکوو ئەو کاتەی لە کۆتاییەکاندا ماندوییەتی پێوە دیار بوو. تەنانەت بە بوونی چەندین بەرگریکار کە لەسەر داوای دیێگۆ سیمیۆنی بە توندی چاودێرییان دەکرد، یامال هەر بەردەوام بوو لە درەوشانەوە.

هێنری لە لێدوانێکیدا بۆ کەناڵی CBS، یامالی بە کریستیانۆ رۆناڵدۆی گەنج چواند و گوتی:

ئەمە ئەو کارەیە کە کریستیانۆی گەنج دەیکرد، دەیتوانی لە چاوپێکەوتنەکاندا بە متمانەوە قسە بکات و دواتر لەنێو یاریگادا بیسەلمێنێت. یامال گوتی رابەرایەتی بارسێلۆنا دەکات و تەنیا چەند خولەکێک دوای دەستپێکردنی یارییەکە، گۆڵی تۆمارکردبوو.

بەڵام ئەوەی هێنری زیاتر سەرسام کردووە، لە بەهرە زیاترە:

ئەوەی سەرنجڕاکێشە، نەبوونی ترسە لای ئەو. لە تەمەنێکی وەها بچووکدا، بە متمانە، داهێنەران و ژیرییەکەوە یاری دەکات کە لە تەمەنی خۆی گەورەترە. لامین خۆی ناشارێتەوە، داوای تۆپ دەکات و لە کاتە هەستیارەکاندا گۆڕانکاری دروست دەکات. ئەمە نیشانەی یاریزانێکی تایبەتە.

هێنری پێی وایە تواناکانی یامال سنووری نییە و هاوشێوەییەک لە نێوان ئەو و لیۆنێل مێسیدا دەبینێتەوە:

مێسی بەهرەیەکی باوەڕپێنەکراوی هەبوو، بەڵام ئەم متمانە بەهێزەی یامال شتێکی بێهاوتایە و بینینی چێژبەخشە. ئەگەر بەردەوام بێت لە هەوڵدان و سەرنجی لەسەر یارییەکەی بێت، هەموو شتێکی تێدایە بۆ ئەوەی ببێتە یەکێک لە باشترینەکانی جیهان.

بۆ هێنری، تەنیا سنوورێک لە بەردەم دەرکەوتنی لامین یامالدا هەبێت، خودی یاریزانەکە خۆیەتی.