یاریگا- نێیمار داسیلڤا بەفەرمی هیلالی جێهێشت و لەگەڵ خۆیدا بڕە پارەیەکی خەیاڵی دەباتەوە وڵاتەکەی لە کاتێکدا شتێکی ئەوتۆی بۆ ئەو یانەیە نەکرد.
هیلال لە بەیاننامەیەکدا سوپاسی نێیماری کرد بۆ خزمەتەکانی، کە لە وەرز و نیوێکدا تەنها لە حەوت یاریدا بەشداریکرد و یەک گۆڵی تۆمارکرد.
نێیمار لە وەرزەدا تەنها دوو یاری کردووە و کۆتایان لە مانگی 11دا بوو. بەڵام ئەمانە نەبوونە هۆی ئەوەی زیاد لە 200 ملیۆن دۆلار کۆنەکاتەوە!
هیلال بڕی 97 ملیۆن دۆلار دایە پاریس تەنها بەرامبەر هەڵوشاندنەوەی گرێبەستی یاریزانەکە.
بەگوێرەی گڵۆبۆ ئیسپۆرتۆی بەڕازیلی، ناوبراو مووچەی 150 ملیۆن یۆرۆی وەرگرتووە بۆ ساڵ و نیوێک لە هیلال، وە 62 ملیۆن یۆرۆ ماوە وەریبگرێت تا کۆتایی وەرز. دوای هەڵوەشاندنەوەشی تەنها لە 15٪ی ئەو 62 ملیۆنە خۆش بووە و 52 ملیۆنی دیکە وەردەگرێت. واتە زیاد لە 200 ملیۆن یۆرۆ.
رۆژنامەی سپۆرتی کاتالۆنیش دەڵێت، نێیمار لەو ساڵ و نیوەدا 163 ملیۆن یۆرۆی دیکەی کۆکردۆتەوە لە گرێبەستە بازرگانی و ریکلامییەکان، هەرچەندە ئەمەیان لەلایەن هیلالەوە نەدراوە.
نێێمار بە کۆی گشتی 431 خولەک یاری کرد، بە هەژمارکردنی کۆی گشتی ئەو پارەیەی هیلال داویەتی وەک مووچە و گرێبەستی گواستنەوەکەی، هەر خولەکێک یاریکردنی نێیمار 650 هەزار یۆرۆ لەسەر یانەکە کەوتووە و هەر یارییەکیش 40 ملیۆن یۆرۆ.
سەرجەم پێشهاتەکان ئاماژە بەوە دەکەن، نێیمار دەگەڕێتەوە بەڕازیل و یاری بۆ یانە دێرینەکەی خۆی سانتۆس دەکاتەوە. وە بە دڵنیاییەوە بە مووچەیەکی زۆر کەمتر لەوەی لە سعوودیە چنگی کەوت.
