دەگەڕێتەوە کاستیا؟ چارەنووسی ئالڤارۆ ئاربێلوا لەدوای راهێنەرایەتی ریال مەدرید

یاریگا –

دوای ماڵئاواییکردنی ریال مەدرید لە چامپیۆنزلیگ و لەدەستدانی هەموو نازناوەکانی ئەم وەرزە، داهاتووی ئالڤارۆ ئاربێلوا بووەتە باسی گەرمی میدیاکان؛ دەگەڕێتەوە کاستیا یاخود وێستگەی داهاتووی راهێنەرایەتی کوێ دەبێت؟

مانۆ کارێنۆ، پێشکەشکاری ناوداری بەرنامەی ‘El Larguero’ـی رادیۆی کادینا سێر، روانگەیەکی جیاواز لەسەر دۆخی راهێنەرە لاوەکەی مەدرید دەخاتەڕوو.

بە بڕوای کارێنۆ، ئاربێلوا کاتێک لە مانگی یەکدا شوێنی چابی ئاڵۆنسۆی گرتەوە، تەنیا مەبەستی خزمەتکردنی یانەکە بووە. دەشڵێت، ئاربێلوا نەهاتبوو بۆ ئەوەی ریال مەدرید بکاتە بازدەرێک بۆ کاروانی پیشەگەری خۆی، ئەو تەنیا وەڵامی بانگەوازەکەی پێرێزی دایەوە کاتێک یانەکە لە تەنگژەدا بوو.

رۆژنامەنووسە ئیسپانییەکە ئاماژە بەوە دەکات کە ئاربێلوا وەک فەرمانبەرێکی دڵسۆزی یانەکە دەمێنێتەوە. پێدەچێت دوای کۆتایی هاتنی ئەم وەرزە، دەگەڕێتەوە کاستیا و سەرپەرشتیکردنی راهێنەرایەتی یانەکە دەگرێتەوە دەست، چونکە ئەو هیچ کاتێک فشارێکی لەو جۆرەی لەسەر کارگێڕی دروستنەکردووە کە وەک راهێنەری یەکەم بۆ ماوەیەکی درێژ بمێنێتەوە.

کارێنۆ کۆتایی بە قسەکانی دەهێنێت و دەڵێت: کلیلەکە لای ریال مەدریدە؛ دەبێت راهێنەرێک بدۆزنەوە کە بتوانێت بە ئەستێرەکان بڵێت ‘دەبێت رابکەن’.