هەولێر بە کۆمەڵێک کێشەوە میوانداری کەربەلا دەکات

یاریگا –

هەولێر لە یاریگای فرانسۆ هەریری بە کۆمەڵێک کێشەوە میوانداری کەربەلا دەکات.

لە گەڕی 16ـەی خولی ئەستێرەکانی عێراق، کاتژمێر 7:30ـی شەو لە یاریگای فرانسۆ هەریری هەولێر و کەربەلا رووبەرووی یەکتر دەبنەوە، هەولێر بەکێشەی دارایی قوڵ تێپەڕ دەبێت و یاریزانەکان دوێنێ مەشقیان نەکردووە و ئەمڕۆش بە پێدانی بەڵێن گەڕاونەتەوە مەشق و دوا ئامادەکاریان بۆ یارییەکەی کەربەلا کرد.

هەولێر و کەربەلا لە مێژوودا 30 یارییان بەرامبەر یەکتر کردووە، هەولێر 14 یاریی بردۆتەوە و لە نۆ یارییشدا یەکسان بوونە و کەربەلاش حەفت یاریی سەرکەوتنی بە دەستهێناوە، هەولێر 43 گۆڵی تۆمار کردووە و کەربەلا 31 گۆڵی تۆمار کردووە، یەکەم یاریی هەر دوو یانە دەگەڕێتەوە بۆ وەرزی 1992 _ 1993 لە خولی نایابی عێراق لە 10 _ 5 _ 1993 کەربەلا 1 _ 0 سەرکەوتنی بە دەستهێنا لە و یارییەی کە لە یاریگای موسڵ بەرێوەچوو، دوایین یارییش لە 5 _ 7 _ 2024 لە خولی ئەستێرەکانی عێراق لە یاریگای فرانسۆ هەریری هەولێر 4 _ 1 یارییەکەی بردەوە.

کەربەلا شەش یارییە لە خولەکە سەرکەوتنی تۆمار نەکردووە، هەولێریش دوایین یاریی سەرکەوتنی بەرامبەر کەرخ بە دەستهێنا، هەولێر بە 22 خاڵ لە ریزبەندی نۆیەمە و کەربەلا بە راهێنەرایەتی حەسەن ئەحمەد بە 15 خاڵ لە ریزبەندی 16ـەی خولی ئەستێرەکانی عێراق دێت.