لالیگا هۆشدارییەکی توند دەداتە ڤینیسیۆس جونیۆر

یاریگا –

بەهۆی ڤینیسیۆس جونیۆرەوە، لالیگا هۆشدارییەکی توند دەداتە ریال مەدرید.

خاڤیێر تێباس، سەرۆکی لالیگا هێرشێکی توند دەکاتە سەر ڤینیسیۆس و بە پێشێلکردنی یاساکانی پەخشی تەلەڤزیۆنی لە ئیسپانیا تۆمەتبار دەکات.

ڤینیسیۆس بەهۆی پێکان، بەشداری لە یاریی رابردووی ریال مەدرید بەرامبەر لیڤەرپوول نەکرد و لە ماڵەوە سەیری یارییەکەی کرد.

تۆڕی رێلێڤۆ بڵاویکردووەتەوە، ڤینیسیۆس ستۆرییەکی ئینستاگرامی بڵاوکردەوە، تیایدا لە ماڵەوە دانیشتبوو و سەیری یارییەکەی دەکرد.

ئەوەی کێشەی دروستکردووە، ڤینیسیۆس لەڕێگەی کەناڵی TNT ی بەڕازیلی سەیری یارییەکەی دەکرد، ئەمەش لە کاتێکدا، تەنیا کەناڵی ‘MovieStar – موڤی ستار’ لە ئیسپانیا مافی پەخشکردنی یارییەکانی چامپیۆنزلیگی هەیە. کەچی ڤینیسیۆس لەڕێگەی نایاساییەوە، کەناڵی TNT بەڕازیلی لە ئیسپانیا هەیە.

تێباس روونیکردووەتەوە، بەهۆی پێشێلکردنی یاساکانی پەخشی تەلەڤزیۆنی، لالیگا ساڵانە 700 ملیۆن یۆرۆ زیانی بەردەکەوێت. بۆیە بە فەرمی ریال مەدریدی ئاگادارکردووەتەوە و رێنمایی پێویستی بۆ ناردووە.

بەگوێرەی بەدواداچوونی تۆڕە ئیسپانییەکە بێت، هەر کەسێک لە ئیسپانیا هەژماری HBOی بەڕازیلی هەبێت، دەتوانێت لە ئیسپانیا سەیری کەناڵەکانی بەڕازیلی بکات، بۆیە لەوانەیە لەڕووی یاساییەوە ڤینی هیچ سەرپێچییەکی نەکردبێت.

لە نامەکەی تێباس بۆ ریال مەدریددا هاتووە

ئەگەر ڤینیسیۆس لە مەدرید بێت، کە پێم وایە لە مەدریدە، ئەمە بە دزی کردن هەژمار دەکرێت. چونکە دەبێ لەڕێگەی کەناڵی موڤی ستار سەیری هەموو شتێکی پەیوەست بە چامپیۆنزلیگ بکرێت. لەوانەیە ڤینیسیۆس بەرنامەیەکی VPN یاخود دیشێکی تایبەتی دانابێت لە ماڵەوە، تاوەکو سەیری کەناڵی دیکە بکات. ئەمە دزیی ئەلیکترۆنییە. نابێ جارێکی دیکە ئەمە رووبداتەوە.

ریال مەدرید بەبێ ڤینیسیۆس 2-0 بە لیڤەرپوول دۆڕا و سبەی لە لالیگا رووبەڕووی خێتافی دەبێتەوە.