مانچێستەر سیتی ئەستێرەیەکی ئیسپانی دەکاتە شوێنگرەوەی رۆدری

یاریگا –

مانچێستەر سیتی بڕیاریداوە لە بازاڕی گواستنەوەی زستانەی داهاتوودا، جێگرەوەی رۆدری بگوازێتەوە.

تیمەکەی پێپ گواردیۆلا بە دۆخێکی سەخت تێدەپەڕێت، بە تایبەت دوای تووشبوونی رۆدری بە پێکانێکی درێژخایەن.

رۆژنامەی سەن بڵاویکردووەتەوە، مان سیتی لە پشتی پەردەوە کار لەسەر ئامادەکردنی ئۆفەرێک بەبڕی 50 ملیۆن پاوەند بۆ گواستنەوەی مارتن زوبیمێندی، یاریسازی ریال سۆسیداد دەکات.

لە هاوینی رابردوودا، یانەکانی لیڤەرپوول، ئارسیناڵ و بارسێلۆنا هەوڵی گواستنەوەی زوبیمێندیاندا، هەرچەندە زۆر لە گواستنەوە بۆ لیڤەرپوول نزیکبوو، بەڵام لەکۆتاییدا بڕیاری مانەوەی لە یانەکەی هەرێمی باسکدا.

هەرچەندە پێشتر یاریزانەکە رایگەیاندبوو، دەیەوێت بۆ وەرزێکی دیکەش لە سۆسیداد بمێنێتەوە و زیاتر گەشە بکات، بەڵام رۆژنامە بەریتانییەکە ئاشکرای دەکات، گواردیۆلا بە هەموو شێوەیەک داوای گواستنەوەی زوبیمێندی دەکات.

زوبیمێندی بەرهەمی ئەکادیمیای ریال سۆسیدادە و 203 یاریی لەگەڵ یانەکەدا کردووە، گرێبەستەکەی لە هاوینی ساڵی 2027 بەسەردەێت.