یاریگا –
تۆماس توخێل، راهێنەری بایرن میونشن دووپاتیدەکاتەوە، ناوبژیوانی یاری شەوی رابردوو دانی بە هەڵەیەکی کوشندە نا.
لە خولەکی 67 یاریی چوونی قۆناخی هەشتی چامپیۆنزلیگی نێوان ئارسیناڵ و بایرن میونشندا، دەیڤد رایای گۆڵپارێز پاسێکی بە گابریێل ماگالایس-دا و یاریزانە بەڕازیلییەکە جارێکی دیکە تۆپەکەی بەدەستد بۆ رایا گەڕاندەوە، چونکە ئاگای لە فیکەی گلێن نیبێرگ نەبوو کە فیکەی لێدابوو. هەرچەندە یاریزانانی بایرن میونشن ناڕەزایەتییان پیشاندا، بەڵام ناوبژیوان پێناڵتی بۆ ئێف سی هۆڵیوود هەژمار نەکرد.
لە دوای یارییەکە تۆماس توخێل قسەی بۆ TNT Sports کرد
پێم وایە ناوبژیوان بوێری هەژمارکردنی پێناڵتی بۆ ئێمە نەبوو، چونکە دۆخەکە زۆر هەستیار و سەیر بوو. هەر لە کاتی یارییەکە دانی بە دروستی پێناڵتییەکە نا، بەڵام بۆ یارییەکی لەم قۆناخەدا، ئەم رووداوە بەس نییە بۆ هەژمارکردنی لێدانێکی سزا، چونکە هەڵەیەکی منداڵانە بوو. ناوبژیوان دانی بە بینینی رووداوەکە نا، بەڵام هیچ بڕیارێکی نەدا.
توخێل پێی سەیرە ناوبژیوان خۆی لە بڕیارێکی لەمشێوەیە دزیوەتەوە و دەڵێت
لێدانی گۆڵ بوو، گۆڵپارێز تۆپەکەی ئاراستەی بەرگریکار کرد و ئەویش بەدەست تۆپەکەی راگرت، پێی وابوو هێشتا یاری دەستیپێنەکردووە. بەڵام ناوبژیوان فیکەی دەستپێکردنەوەی یارییەکەی لێدابوو، بۆیە ئەمە فاوڵە و زۆر نیگەرانین.
17ی ئەم مانگە یاری گەڕانەوە لە ئالیانز ئارێنا دەکرێت و هەردوو یانە بە ئەنجامی 2-2 یارییەکە دەستپێدەکەن. بەڵام پێش ئەمە ئارسیناڵ یارییەکی قورسی لە پرێمەرلیگ بەرامبەر ئاستۆن ڤیلا هەیە و میونشنیش لە بۆندسلیگا بەرامبەر کۆڵن یاری دەکات.
