“باشترین گرێبەستی ئەم وەرزی پرێمەرلیگ چێڵسی واژۆی کردووە”
یاریگا –
جۆ کۆل، ئەستێرەی پێشووی چێڵسی پێی وایە کۆل پاڵمەر، باشترین گرێبەستی ئەم وەرزە بووە لە پرێمەرلیگدا.
پاڵمەر لەو کاتەوەی پەیوەندی بە چێڵسیەوە کردووە، توانیویەتی توانا و بەهرەی درەوشاوەی خۆی لە پێکهاتەی ئەم تیپەدا نیشان بدات و لە زۆرێک لە یارییەکانیشدا یارمەتی بلوزی داوە بۆ ئەوەی گۆڵ بکات و ئەنجامی خوازراو بەدەستبهێنێت.
لە یارییەکەی هەفتەی رابردوودا بەرامبەر مانچێستەر یونایتد، ئەم ئەستێرە گەنجە ئینگلیزییە باشترین یاریزانی تیپەکەی و باشترین یاریزانی نێو یاریگا بوو، هەروەها توانی لە کۆی چوار گۆڵی چێڵسی سێ گۆڵ تۆماربکات و رۆڵی گرنگ بگێڕێت لە بەدەستهێنانی سێ خاڵی بەنرخ لەم یارییەدا.
Joe Cole on Cole Palmer ‘Even he must be thinking, what’s going on here? How have I got this time? He’s been remarkable. I would say, signing of the season. pic.twitter.com/0m9Qecu1yC
— Ballboxtv_ (@ballboxtv) April 4, 2024
لە چاوپێکەوتنێکیدا لەگەڵ کەناڵی تی ئێن تی سپۆرت، کۆل سەبارەت بە درەوشاوەیی یاریزانەکە گوتی:
ئەو شتەی زۆر جێی سەرنجە کاردانەوەی ئەو یاریزانەیە. تازە گۆڵی براوەی تیپەکەی لە کۆتا خولەکدا تۆماردەکات، بەڵام وەک ئەوە مامەڵە دەکات کە تازە هاتووەتە ناو یاریگا و پڕ وزەیە. ئارامترین پیاوی ناو یاریگایە. هاندەرانی چێڵسی ئەویان خۆش دەوێت. پاڵمەر بەڕاستی زۆر نایاب و سەرنجڕاکێشە. دەبێت بڵێم باشترین کڕینی ئەم وەرزەی پرێمەرلیگە.
پالمەر لەگەڵ چێڵسی توانیویەتی خۆی بگەیەنێتە گۆلکارانی ئەم وەرزەی پرێمەرلیگ و بە کردنی 16 گۆڵ لەگەڵ سۆلانکێی هێرشبەری بۆرنمۆس و ئۆلی واتکینس گۆڵەکانی یەکسان بکاتەوە و لەدوای ئێرلینگ هالاندەوە دێن.
