یاریگا –
ئەرکان مەنسوڕ یاریزانی یانەی ئاکرێ بە ئەستێرەی گەڕی بیست و شەشەمی خولی نایابی کوردستان دەستنیشانکرا، کە هەفتانە تۆڕی وەرزشی یاریگا باشترین یاریزانی خولەکە دەستنیشان دەکات.
ئەرکان مەنسوڕ لە یاریی ئاکرێ و پێشمەرگەی هەولێر کە یاریی لوتکەی ئەم گەڕەی خولی نایابی کوردستان بوو، باشترین ئاستی پێشکەش کرد و بە دوو ئەسیست بووە هۆی ئەوەی ئاکرێ 3-1 لە پێشمەرگەی هەولێر بباتەوە و بێتە پێشەنگی خولەکە.
ئەرکان مەنسوڕ لەم وەرزەی خولی نایابی کوردستان 8 ئەسیست و 7 گۆڵی کردووە و پێشەنگی گۆڵدروستکارانی خولەکەی گرتووە و تاکە یاریزانە لە خولەکە بەشداریی 15 گۆڵی خولەکەی کردووە.
ئاکرێ لەم وەرزە لە نووسینەوەی مێژوو نزیکبووەتەوە و بە کۆکردنەوەی 44 خاڵ پێشەنگی خولەکەی گرتووە و بە جیاوازیی دوو خاڵ لەپێشەوەی شێروانە و پێشمەرگەی هەولیر دێن.
لە گەڕی بیست و شەشەمی خولەکە، ئاکرێ سوودمەنترین یانەی گەڕەکە بوو، لە یاریگای خۆی لە پێشمەرگەی هەولێری بردەوە و پێشەنگی بە یانەکەی پیرمام چۆڵ کرد، شێروانەش لە یاریگای خۆی بەبێ گۆڵ لەگەڵ رانیەی میوانی یەکسان بوو.
