یاریگا –
ئەمڕۆ شەممە لە یارییەکانی گەڕی یازدەی لالیگا، کاتژمێر 17:15 بە کاتی کوردستان، بارسێلۆنا لە یاریگای مۆنجویک میوانداری ریال مەدرید دەکات.
بەر لەم یارییە، ریال مەدرید بە کۆکردنەوەی 25 خاڵ پلەی دووەمی لالیگای گرتووە، بارسێلۆناش بە کۆکردنەوەی 24 خاڵ پلەی سێیەمی گرتووە.
یارییەکە بۆ هەردوو یانە گرنگی زۆری هەیە، ریال مەدرید بە بردنەوە دەگەڕێتەوە پێشەنگی لالیگا، بارساش بە بردنەوە دەچێتە پلەی دووەمی خولەکە و تەنیا خاڵیک جیاوازی دەبێت لەگەڵ جیرۆنای پێشەنگدا.
مێژووی رووبەڕووبوونەوەی نێوان بارسێلۆنا و ریال مەدرید
ریال مەدرید و بارسێلۆنا لە مێژوودا 254 یاری فەرمیان کردووە، مەدرید 102 یاری بردووەتەوە، بارساش 100 یاری بردووەتەوە و لە 52 یاریشدا یەکسانبوون.
لۆس بلانکۆس 424 گۆڵی لە کلاسیکۆدا کردووە، کاتالۆنییەکانیش 415 گۆڵیان کردووە.
لالیگا
هەردوو یانە لە لالیگا 186 یارییان بەرامبەربە یەکتر کردووە، مەدرید 77 یاری بردووەتەوە، بارساش 74 یاری بردووەتەوە و لە 35 یاریشدا یەکسانبوون.
جامی شای ئیسپانیا
لە جامی شا 37 کلاسیکۆ کراوە، بارسێلۆنا 16 یاری بردووتەوە، ریالیش 13 یاری و لە 8 یاریدا یەکسانبوون.
جامی سوپەری ئیسپانیا
ریال و بارسا لە جامی سوپەری ئیسپانیا لە 16 یاریدا رووبەڕووبوونەتەوە، مەدریدییەکان 9 یارییان بردووەتەوە و کاتالۆنییەکانیش 5 یاری، لە 2 یاریشدا یەکسانبوون.
چامپیۆنزلیگ
لە خولی یانە پاڵەوانەکانی ئەوروپا 8 جار رووبەڕووبوونەتەوە، ریال مەدرید 3 یاری بردووەتەوە، بارسێلۆنا 2 یاری بردووەتەوە و لە 3 یاریدا یەکسانبوون.
Copa de la Coronación
ئەم جامە یەک جار کراوە، هێشتا وەک یارییەکی فەرمی لەلایەن یەکێتی تۆپی پێی ئیسپانیا دانپێدانەنراوە، بەڵام هەندێک لە میدیا و سەرچاوەکان وەک یارییەکی فەرمی هەژماری دەکەن، بارسێلۆنا ئەو تاکە یارییەی لە ریال مەدرید بردووەتەوە.
Copa de la laliga
ئەم جامە ئێستا بوونی نەماوە، 6 جار بارسا و ریال تیایدا رووبەڕووبوونەوتەوە، بارسێلۆنا 4 یاری بردووەتەوە و لە 2 یاریدا یەکسانبوون.
