یاریگا –
برۆنۆ فێرناندێز، كاپتن و سەركردەی یانەی مانچێستەر یونایتدی ئینگلیزی دڵخۆشی خۆی دەربڕی بە بردنەوەكەیان بەرامبەر نۆتینگهام.
شەوی رابردوو مانچێستەر یونایتد لە یاریگای ئۆلد ترافۆردی تایبەت بە خۆی میوانداری نۆتینگهامی كرد و یاریەكەشی بە ئەنجامی سێ گۆڵ بەرامبەر دوو گۆڵ لێ بردەوە، لە میانی یارییەكانی هەفتەی سێیەمی پرێمەرلیگ.
لە خولەكەكانی 2,4 نۆتینگهام گۆڵی یەكەم و دووەمیان كرد و پاشان شەیتانە سوورەكان گەڕانەوە و لە خولەكەكانی 17,52,76 سێ گۆڵیان لە رێگەی ئیریكسن، كاسیمیرۆ و برۆنۆ فێرناندیزەوە تۆمار كرد و سێ خاڵی یارییەكەیان بەدەست هێنا.
Relief for the Reds! 🔴#MUFC || #MUNNFO
— Manchester United (@ManUtd) August 26, 2023
لە لێدوانەكانیدا بۆ پێگەی وەن فوتبۆڵ برۆنۆ ووتی: دەستپێكێكی باش نەبوو بۆ ئێمە، بەڵام پارێزگاریمان لە خۆمان و لە هێشتنەوەی تۆپ كرد و دەستمانكرد بە یارییەك كە كەمترین هەڵەی تێدا بكەین.
بەردەوام بوو ووتی: ئەوان بە باشی بەرگریان دەكرد، قورس بوو گەیشتن بە تۆڕی گۆڵەكەیان، بەڵام ئەنجامماندا ئەوە گرنگترین شتە.
لە درێژەی قسەكانیدا ووتی: دەمزانی کاتمان هەیە بۆ گۆڕینی دۆخەکە، بەڵام ئاراممان گرت، دەستمان کرد بە هێشتنەوەی تۆپ لە دواوە و بەدەستهێنانی متمانە، دوای ئەوەش یارییەکە هەمیشە لە بەرژەوەندی ئێمە بوو، بە گشتی ئاستی یارییەكە باش بوو جگە لە چوار خولەكی یەکەم.
كاپتنەكەی شەیتانە سوورەكان لە كۆتاییشدا ووتی: ئێمە دەزانین یاریزانی مانچێستەر یونایتد چۆنە، دەزانین ئەم درێسە داوای زۆر دەکات و ئێمەش ئامادەین بۆ ئەوە، تیپەکە رۆح و سۆز و ئارەزووی گەورەی نیشان دا، تەنیا دەبێت بزانین کە نابێت زوو گۆڵمان لێ بكرێت.
مانچێستەر یونایتد بە كۆكردنەوەی شەش خاڵ لە ریزبەندی شەشەمی خولی ئینگلیزی دێت دوای ئەنجامدانی سێ هەفتەی سەرەتا.
