بێنزێما چوارەم گۆڵكاری مێژووی خولی ئیسپانیایە

یاریگا –

كەریم بێنزێما، هێرشبەری فەڕەنسی یانەی ریال مەدریدی ئیسپانی بوو بە چوارەم گۆڵكاری مێژووی خولی ئیسپانیا.

شەوی رابردوو ریال مەدرید لە یاریگای خۆیدا میوانداری ئەلمیریای كرد و یاریەكەشی بە ئەنجامی چوار گۆڵ بەرامبەر دوو گۆڵ لێ بردەوە، لە میانی یارییەكانی هەفتەی 32ی خولی ئیسپانیا.

لەو چوار گۆڵەی یانەكەی كەریم بێنزێما توانی هاتریك تۆمار بكات و ژمارەی گۆڵەكانی لەم وەرزەی لالیگا بۆ 17 گۆڵ بەرز بكاتەوە.

بەپێی زانیاریەكانی تۆڕی ئۆپتا كە تایبەتە بە ژمارە و ئامارەكان بێنزێما ژمارەی گۆڵەكانی بۆ 236 گۆڵ بەرز كردەوە و پێش هۆگۆ سانچێزی مەكسیكی و هێرشبەری پێشووی ریال مەدرید كەوت كە خاوەنی 234 گۆڵ بوو.

لیۆنێل مێسی لە ریزبەندی یەكەمی گۆڵكارانی لالیگا دێت بە 474 گۆڵ و لە پلەی دووەمیش كریستیانۆ رۆناڵدۆ دێت بە 311 گۆڵ هەروەها تیلمۆ زارا لە پلەی سیێیەم دێت بە 252 گۆڵ.

لیڤاندۆڤسكی بە تۆماركردنی 19 گۆڵ لە پێشەنگی گۆڵكارانی ئەم وەرزەی لالیگا دێت و بێنزێماش بە 17 گۆڵ لە ریزبەندی دووەمدایە.