لیڤاندۆڤسكی هەر زوو جەنگی پاریس و بارسێلۆنای كۆتایی پێهێنا

یاریگا-

ڕۆبەرت لیڤاندۆڤسكی پۆڵەندی و ئەستێرەی یانەی بایرن میونشنی ئەڵمانی هەر زوو جەنگی پاریس سان جێرمان و بارسێلۆنای كۆتایی پێهێنا.

گرێبەستەكەی هێرشبەرە پۆڵەندیەكە لەگەڵ بایرن لە هاوینی ساڵی 2023 بەسەردەچێت و پێشتریش چەند جارێك خواستی خۆی بۆ جێهێشتنی یانەكەی دەربڕیوە.

بەپێی زانیاریەكانی ڕۆژنامەی مۆندۆ دیپۆرتیڤۆی ئیسپانی نوێنەرانی لیڤاندۆڤسكی دووپاتیانكردەوە كە پلانەكەی لیڤاندۆڤسكی نەگۆڕاوە دوای ئەوەی پاریس هاتە نێو كێبڕكێیەكەوە.

هەروەها ئەوەشیان ئاشكرا كرد كە یاریزانەكە سورە لەسەر بڕیارەكەی خۆی و دەیەوێت تەنها پەیوەندی بە بارسێلۆناوە بكات و لەو یانەیە یاری بكات وەرزی داهاتوو.