یاریگا–
کارگێری یانەی بارسێلۆنای ئیسپانیا دوای گواستنەوەی فێران تۆرێس، هێرشبەرە لاوەکەی یانەی مانچێستەر سیتی، ئەمجارەیان توانیویانە لەگەڵ فابیۆ بلانکۆ هێرشبەرە لاوەکەی یانەی ئاینتراخت فرانکفۆرتی ئەڵمانیا بگەنە رێکەوتن.
رۆژنامەی وەرزشی سپۆرتی کەتەلۆنی بڵاویکردەوە، کارگێری بلاوگرانا چەند رۆژێکە لەگەڵ بەرێوەبەری کارەکانی یاریزانە لاوەکەی یانە ئەڵمانیەکە لەسەر هێلن و دواجار هەردوولا گەیشتنە رێکەوتن و بریارە لە ماوەی چەند کاتژمێری داهاتوو، گواستنەوەی فەرمی ئەو یاریزانە بۆ ریزەکانی بارسا بڵاوبکرێتەوە.
بلانکۆ تەمەنی 17 ساڵە و ئەو یاریزانە هاوینی رابردوو بریار بوو دوای جێهێشتنی یانەی ڤالێنسیا پەیوەندی بە بارسێلۆناوە بکات، بەڵام دواجار بریاریدا پەیوەندی بە یانە ئەڵمانیەکەوە بکات و لەگەڵ تیپی خوار 19 ساڵانی ئەو یانەیە بەشداری 8 یاری کرد و توانی 2 گۆڵ تۆمار بکات.
