یاریگا–
ئالێکساندەر چێفرین، سەرۆکی فێدراسیۆنی تۆپی پێ ئەوروپا ” یوێفا ” بیرۆکەی دامەزراندنی سوپەر لیگی ئەوروپا بە کارێک ناڕەوا دەزانێت و باس لە سزای ئەو سێ یانەیەش دەکات کە تاوەکو ئێستا سورن لەسەر کردنەوەی ئەم خولە.
سەرۆکەکەی یوێفا لە نوێترین قسەکانیدا سەبارەت بە هەر سێ یانەی ریال مەدرید، بارسێلۆنا و یۆڤێنتۆس کە تاوەکو ئێستا سورن لەسەر بەڕێوەچوونی خولی سوپەر بە تۆڕی هەواڵی سکای سپۆرتی گووت ” پێم سەیرە ئەو سێ یانەیە داوای خولێکی نایاسایی دەکەن، لە هەمان کاتیشدا نامەمان بۆ دەنێرن کە دەیانەوێت بەشداری چامپیۆنزلیگ بکەن، ئەوان ئەگەر بیانەوێت ئەو خولەی کە باسی دەکەن بکرێتەوە، دەتوانن بە تەنهایی بەشداری بکەن، چونکە لە نێوان هەزارەها یانە، تەنها سێ یانە کەن کە پشتگیری پرۆژەکە دەکەن ”.
چێفرین لە بەشێکی دیکەی قسەکانیدا سەبارەت بە سزای ئەو سێ یانەیە گووتی ” لیژنەی تەمبێکاری لە یوێفا سەربەخۆیە و هیچ کەسێک ناتوانێت دەستکاری بریارەکانی بکات، ئەوان لەسەر لێکۆڵینەوەکانیان بەردەوامن و هەر بریارێکیش بدەن، ئێمە رێزی لێدەگرین و تاوەکو ئێستاش ئاگادار نیم کە ئایا سزای ئەو سێ یانەیە چۆن دەبێت”.
