یاریگا–
رافایل ڤاران، بەرگریکاری فەرەنسی یانەی ریال مەدریدی ئیسپانیا ئامانجی یەکەمی ئەم هاوینەی یانەی مانچێستەر یونایتدی ئینگلیزیە و ئەو یانەیە ئامادەیە لە پێناو گواستنەوەی ئەو یاریزانە پارەیەکی خەیاڵی خەرج بکات.
رۆژنامەی دەیلی مایلی بەریتانی زانیاری دەستکەوتووە، کارگێری شەیتانە سوورەکان لە پێناو بەهێز کردنی هێلی بەرگری یانەکەیان، چاویان لە گواستنەوەی بەرگریکارە فەرەنسیەکەی شایانەکانە و ئامادەن بۆ گواستنەوەی ئەو یاریزانە، 70 ملیۆن یۆرۆ پێشکەش یانە ئیسپانیەکە بکەن، بۆیە چاوەڕێ دەکرێت پێش دەست پێکردنی یۆرۆی 2020 گفتوگۆی نێوان هەردوو یانە دەست پێ بکات.
ڤاران هاوینی ساڵی داهاتوو گرێبەستەکەی لەگەڵ ریال مەدرید کۆتایی دێت و تاوەکو ئێستاش ئامادەنەبووە گرێبەستەکەی نوێ بکاتەوە، بۆیە شایانەکان دەیانەوێت پێش ئەوەی گرێبەستەکەی بەسەرچێت بەرامبەر پارەیەکی باش دەستبەرداری بن.
