یاریگا–
توماس توخێل، راهێنەری ئەڵمانی یانەی چێڵسی ئینگلیزی دوای بەدەست هێنانی کۆمەڵێک ئەنجامی باش و بەتایبەت گەیشتنی یانەکەی بۆ یاری کۆتایی چامپیۆنزلیگ، بەرپرسانی یانەکەی ناچار کردووە لە ئێستاوە بیر لە درێژ کردنەوەی گرێبەستەکەی بکەنەوە.
رۆژنامەی دەیلی مایلی بەریتانی ئاشکرای دەکات، ئەنجامە باشەکانی راهێنەری ئەڵمانی بلوز، کارگێری ئەو یانەیەی ناچار کردووە بیر لە درێژ کردنەوەی گرێبەستەکەی بکەن، بۆیە چاوەڕێ دەکرێت دوای کۆتایی هاتنی ئەم وەرزە، گرێبەستەکە بۆ ماوەی سێ ساڵی دیکەش، واتە تاوەکو کۆتایی ساڵی 2025 درێژ بکرێتەوە کە ئێستا ئەو راهێنەرە تاوەکو کۆتایی مانگی شەشی ساڵی 2022 گرێبەستەکەی هەیە.
توخێل لەو کاتەوەی پۆستی راهێنەرایەتی یانەی چێڵسی وەرگرتووە، لە سەرجەم خوڵ و پاڵەوانتیەکان 25سەرکردایەتی یانەکەی کردووە و 17 یارییان بردووەتەوە و تەنها لە دوو یاری دۆڕاون.
