یاریگا –
چاوەڕوانییەکە بەنزیکەیی کۆتاییی پێ هاتووە. جێگرەوەی دیدیێ دیشام وەکوو راهێنەری هەڵبژاردەی فەڕەنسا ئەم سێشەممەیە، 28ی تەممووز، لە کاتی کۆنگرەیەکی رۆژنامەوانییدا ئاشکرا دەکرێت.
یەکێتیی تۆپی پێی فەڕەنسا کۆتایی بە هەموو پێشبینی و دەنگۆیەکان دەهێنێت. لە بەیاننامەیەکدا کە رۆژی پێنجشەممە بڵاو کرایەوە، یەکێتییەکە راگەیاند کە راهێنەرە نوێیەکەی فەڕەنسا رۆژی سێشەممە، 28ـی تەممووز، لە کاتژمێر 12:00ـی نیوەڕۆ بە کاتی هەولێر، کۆنفرانسەکەی بەڕێوە دەچێت. بەگوێرەی لۆ پێرسیان، لە کاتی کۆبوونەوەکەدا، چاوەڕوان دەکرێت زێنەدین زیدان دوای واژۆکردنی گرێبەستێکی چوار ساڵە کە تاوەکوو جامی جیهانیی 2030ا دەخایەنێت، بە فەرمی ئاشکرا بکرێت.
نهێنییەکە ئیتر نزیکەی بە نهێنی نەمابووەوە، تەنیا چاوەڕێی فەرمیبوونی دەکرا.
Le président de la FFF, @PhilippeDiallo présentera le prochain sélectionneur de l’Équipe de France le mardi 28 juillet, à 11h00, lors d’une conférence de presse.https://t.co/sgj8AFWJVD
— FFF (@FFF) July 23, 2026
لە تەمەنی 54 ساڵیدا، براوەی جامی جیهانیی 1998 لە لێواری دەستپێکردنی قۆناخێکی نوێیە لە ژیانی پیشەگەرییدا، دوای 32 ساڵ بەسەر یەکەم دەرکەوتنیدا لەگەڵ فەڕەنسا لە 17ـی ئابی 1994. دوای تۆمارکردنی هەندێک لە مەزنترین لاپەڕەکانی مێژووی تۆپی پێی فەڕەنسا وەکوو یاریزانێک و بەدەستهێنانی سەرکەوتنی گەورە وەکوو راهێنەری ریال مەدرید، ئێستا زیدان ئەو رۆڵە دەگرێتە ئەستۆ کە تۆپی پێی فەڕەنسا ماوەیەکی درێژ بوو هیوای دەخواست قبووڵی بکات.
راهێنەرەکەی پێشووی ریال مەدرید چاوەڕێی راگەیاندنی فەرمیی نەکردووە بۆ دەستپێکردنی ئامادەکارییەکان بۆ ئەم ئەركە. بۆ چەند هەفتەیەک، لەپاڵ فیلیپ دیالۆی سەرۆکی یەکێتییەکە و بەرپرسانی یەکێتییەکەدا کاری لەسەر پێکهاتەی سەردەمی دەسەڵاتی خۆی کردووە، بە تایبەتی دیارییکردنی دەستەی راهێنەرایەتییەکەی.
یەکەم ئەندامانی دەستەی راهێنەرایەتی پشتڕاست کرانەوە
بەشێک لە دەستەی راهێنەرایەتیی زیدانیش لە کاتی کۆنفرانسەکەی رۆژی سێشەممەدا ئاشکرا دەکرێن.
وەکوو چاوەڕوان دەکرێت، داڤید بێتۆنیی یاریدەدەری دێرینی پەیوەندیی پێوە دەکات، لەگەڵ کەسایەتییەکی دیکەی جێی متمانەی سەردەمی ریال مەدرید بە ناوی حەمیدۆ مسایدی.
ستێفان پلانک دەبێتە بەشێک لە بەشی دۆزینەوەی بەهرەمەندان، گڕێگۆری دوپۆن وەکوو راهێنەری توانای جەستەییی تیمەکە دەگەڕێتەوە و دکتۆر هێڕڤێ کۆلادۆ سەرپەرشتیی بەشی پزیشکی دەکات کە ئێستا لەژێر پرۆسەی بونیادنانەوەی گەورەدایە.
سەرەڕای ئەوەش دەستەی راهێنەرایەتی هێشتا بە تەواوی کۆتایی پێ نەهاتووە.
دەستبەکاربوونی فابیان بارتێزی گۆڵپارێزی پێشووی فەڕەنسا، کە چاوەڕوان دەکرێت لەگەڵ گۆڵپارێزەکاندا کار بکات و بێرنارد دیۆمێدی راهێنەری تیمی ژێر 19 ساڵانی فەڕەنسا، کە کارێکتەری لای یەکێتییەکە و زیدانیش زۆر بەرز دەنرخێنرێت، هێشتا لە قۆناخی کۆتاییدان.
چاوەڕوان دەکرێت چەندین دەستبەکاربوونی دیکەش لە درێژەی مانگی ئابدا ئەنجام بدرێن، کاتێک یەکێتییەکە پێکهێنانی دەستەیەکی کارگێڕیی و راهێنەرایەتیی بە شێوەیەکی بەرچاو نوێکراوە تەواو دەکات.
یەکەم یاری لە 25ـی ئەیلوول دەبێت
راهێنەرە نوێیەکەی فەڕەنسا بە خێرایی سەرنجی دەخاتە سەر تۆپی پێی رکابەری. دوای ئەوەی مانگی ئاب بۆ جێبەجێکردنی شێواز و رێکخستنەکانی تەرخان دەکات، زیدان لە مانگی ئەیلوولدا یەکەم لیستی یاریزانانی هەڵبژاردەی فەڕەنسا رادەگەیەنێت.
یەکەم دەرکەوتنی فەرمیی لەسەر هێڵی یاریگە لە 25 ی ئەیلوولدا دەبێت، کاتێک فەڕەنسا بۆ یارییەکی نەیشنزلیگ گەشت دەکات بۆ کۆجائێلی لە تورکیا، کە یەکەم یاریی دەسەڵاتێک دەبێت کە چاوەڕوان دەکرێت لێ بلوز تاوەکوو جامی جیهانیی 2030ـی بەڕێوە ببات.
