چاوەڕواننەکراو؛ تۆماس مونێی پەیمانەکەی لەگەڵ ڤالێنسیا دەشکێنێت

یاریگا –

تۆماس مونیێ، ڤالێنسیای ئاگادار کردووەتەوە کە پابەندی ئەو رێککەوتنە نابێت کە هەفتەی رابردوو پێی گەیشتبوون، ئەمەش وای لە ڤالێنسیا کرد ئۆفەرێک پێشکەشی ئاستۆن ڤیلا بکات بۆ کڕینی ئاندرێس گارسیا.

تۆپی پێ و بازاڕی گواستنەوەش دەکرێت پێشبینینەکراو بن. تاوەکوو گرێبەستەکان واژۆ دەکرێن، هەموو شتێک ئەگەری روودانی هەیە. ڤالێنسیا پێی وابوو کە پێشتر تۆماس مونیێی مسۆگەر کردووە کاتێک ئیسپانیا، بەلجیکای کردە دەرەوە. یانەکە هەفتەیەک لەمەوبەر گەیشتبووە رێککەوتن لەگەڵ یاریزانەکە، وەکوو ئەوەی رۆژنامەی ئاس لە کۆتایی هەفتەی رابردوودا بڵاوی کردبووەوە. هەموو شتێک یەکلاکرابووەوە: مەرجە کەسییەکان، ماوەی گرێبەستەکە… تەنیا پشکنینە پزیشکییەکە مابووەوە.

ئەو راستییەی کە لە رۆژانی رابردوودا و دوای مۆندیال هیچ جووڵەیەک لەلایەن یاریزانەکەوە نەبوو، نیگەرانیی لای ڤالێنسیا دروست کردبوو. لە چەند کاتژمێری رابردوودا، هەواڵەکە بڵاوبووەوە. بەگوێرەی رۆژنامەی ئاس، مۆنیێ بڕیاریداوە پابەندی رێککەوتنەکە نەبێت و لەبری ئەوە پەیوەندی بە یانەیەکی دیکەوە دەکات، کە بە ئەگەرێکی زۆرەوە سەندەرلاند گرێبەستێکی دوو ساڵەی پێشکەش کردووە (ئۆفەرەکەی ڤالێنسیا 1+1 بوو).

یانەکە زۆر لە یاریزانە بەلجیکییەکە تووڕەیە. کارلۆس کۆربێران ئەو یاریزانەی لەپێش بەربژێرەکانی دیکەیەوە هەڵبژاردبوو و مۆنیێ دوای ئەوەی هەموو شتێک بە زارەکی رێککەوتنی لەسەر کرابوو، ئەوانی بەجێهێشت. ڤالێنسیا کاتی بەفیڕۆ نەدا لە گەڕان بەدوای جێگرەوەکاندا و ئێستا ئۆفەرێکی فەرمیی بە خواستن پێشکەشی ئاستۆن ڤیلا کردووە بۆ کڕینی ئاندرێس گارسیا. کار و کاردانەوە.

ڤالێنسیا چەند هەفتەیەک لەمەوبەر ئارەزووی خۆی بۆ ئەم بەرگریکارە ئیسپانییە نیشاندابوو، بەڵام کۆربێران گواستنەوەکەی راگرتبوو چونکە پێی باشتر بوو یاریزانێکی خاوەن ئەزموونی زیاتر وەکوو مۆنیێ بهێنێت. بە رەتکردنەوەی یانەکە لەلایەن یاریزانە بەلجیکییەکەوە، ئێستا یانەکە بژاردەی ئاندرێس گارسیای بە پێشنیازێکی فەرمی کارا کردووە. ئێستا بڕیارەکە لە دەستی یاریزانەکەدایە کە ئایا ئەو دەرفەتە قبووڵ دەکات بۆ پەیوەندیکردنی بە ڤالێنسیاوە یان نا.

جۆرێک لە هێمنی لە ڤالێنسیا هەبوو دوای رەزامەندییەکەی مۆنیێ و لەگەڵ دەستپێکردنی چاکبوونەوەی دیمیتری فۆلکیێ. بەڵام، ئێستا دۆخەکە بە تەواوی گۆڕاوە. یانەکە بەپەلە پێویستی بە بەرگریی باڵی راست هەیە بۆ ئامادەکارییەکانی پێش وەرز، ئەمەش دوای رۆیشتنی تیێری کۆریا و ساراویا. ئاندرێس گارسیا گەڕاوەتەوە ناو باسەکە و چاوەڕوانی وەڵام دەکرێت لە چەند کاتژمێری داهاتوودا.