کێشەکە لە مەدریدە؛ دووگاری بەرگریی لە کیلیان ئێمباپێ دەکات

یاریگا –

براوەی مۆندیال ئەو رەخنانەی رەتکردەوە کە ئاراستەی کیلیان ئێمباپێ کراون.

کیلیان ئێمباپێ مۆندیالێکی ئاسایی بەڕێ ناکات. کاپتنی تیمی نیشتمانیی فەڕەنسا لە پاڵەوانییەتییەکەدا دەدرەوشێتەوە و ئێستا گەورەترین نیگەرانیی ئیسپانیایە لە یاریی پێشکۆتایی. لەبەر ئەوە گفتوگۆ سەبارەت بە وەرزەکەی لە تەلەفزیۆنی فەڕەنسی ورووژێندرا. لە بەرنامەی Rothen s’enflammeـی RMC، کریستۆف دووگاری ئەو رەخنانەی مەحکووم کرد کە لەم وەرزەدا ئاراستەی کیلیان ئێمباپێ کراون. ئەو پێی وایە رەخنەکان بێ بنەمان و داوای لە ریال مەدرید کرد پێداچوونەوە بە کێشەکانی خۆیدا بکات.

یاریزانەکەی پێشووی هەڵبژاردەی فەڕەنسا گوتی:

ئەوانە گەمژەن، من نازانم ئەو کەسانەی باسی کیلیان ئێمباپێ دەکەن خاوەنی بلیتی وەرزیین و لە راستیدا دەچنە یاریگاکان یان نا. گوتنی ئەوەی یاریزانێک کە 42 گۆڵی لە 44 یارییدا کردووە، هۆکاری ئەوەیە ریال مەدرید هیچ نازناوێکی نەبردووەتەوە، بۆ من بە تەواوی قبووڵنەکراوە. تۆ هەمیشە دەتوانیت چاوەڕوانی ئاستی باشتر لە یاریزانێک بکەیت، بەڵام ‘ئاستی باشتر’ واتای چییە کاتێک تۆ 42 گۆڵت لە 44 یارییدا کردووە؟ ئەگەر ئیسپانییەکان دەیانەوێت رەخنە لە کیلیان ئێمباپێ بگرن، دەبێت رەخنە لە بێڵینگهام، ڤینیسیۆس و تەواوی ئەو یاریزانانەش بگرن کە بەشدارییان لە مۆندیالدا کردووە و لەگەڵ تیمی نیشتمانییەکانیاندا ئاستێکی زۆر باشتر پێشکەش دەکەن. بەڵام ئەگەر هەموو کەسێک لەگەڵ تیمی نیشتمانییەکانیاندا ئاستی باشتر بێت، ئەوا کێشەکە زیاتر لە ریال مەدرید خۆیدایە.

دووگاری درێژەی بە قسەکانیدا و گوتی:

ئەمڕۆ، من پێم وایە ریال مەدرید لە پاشەکشەدایە؛ کێشەکە کیلیان ئێمباپێ نییە. ئەو هەمیشە دەتوانێت باشتر بێت و هاوڕام لەگەڵ ئەو بۆچوونەی کە دەڵێت دەبێت رەفتاری باشتر بکات. ئەو پێویستە کەمێک زیاتر سەرکردایەتی نیشان بدات، بەڵام لەوانەیە هاوكات پێویستی بە کاتیش بێت.