بۆچی رێگە بە ئەرجەنتین درا قۆڵبەندی رەش ببەسترێت بەڵام رێگە بە فەڕەنسا نەدرا؟

یاریگا –

یاریزانانی ئەرجەنتین رێگەیان پێدرا لە ماوەی یاریی قۆناخی چارەکی مۆندیال بەرامبەر سویسرا قۆڵبەندی رەش ببەستن وەکوو رێزلێنانێک بۆ یاریزانی پێشوو ئانتۆنیۆ راتین. ئەمە لە کاتێکدایە کە فیفا داواکارییەکی هاوشێوەی فەڕەنسای پێش یارییەکەی بەرامبەر نەرویج رەتکردبووەوە.

ئایا ئەمە جیاکارییە بۆ ئەرجەنتین؟ لە کاتێکدا دەنگۆکان لەسەر سوودمەندبوونی ئەرجەنتین (بەتایبەت لە بڕیارەکانی ناوبژیوانییدا) لە مۆندیالی 2026 بەردەوامن، وردەکارییەکی بچووک سەرنجی چاودێرانی راکێشا. هاوتیمەکانی لیۆنێل مێسی لە یاریی رۆژی شەممە بەرامبەر سویسرا قۆڵبەندی رەشیان لەسەر قۆڵی راستی درێسەکانیان بەستبوو.

یاساکانی فیفا چی دەڵێن؟

ئەم هەنگاوە وەکوو رێزلێنانێک بوو بۆ ئانتۆنیۆ راتینی یاریزانی پێشووی تیمی نیشتمانیی ئەرجەنتین کە لە تەمەنی 89 ساڵیدا کۆچی دوایی کرد. یەکێتیی تۆپی پێی ئەرجەنتین (AFA) داواکارییەکی پێشکەشی فیفا کرد و ئەوانیش پەسەندیان کرد. بەڵام چەند رۆژێک پێشتر، دامەزراوەی بەڕێوەبەری تۆپی پێی جیهان داواکارییەکی یەکێتیی تۆپی پێی فەڕەنسا (FFF)ـی رەتکردەوە، کە داوایان کردبوو یاریزانەکانیان لە یاریی بەرامبەر نەرویج قۆڵبەندی رەش ببەستن وەکوو رێزلێنانێک بۆ دایکی دیدیێ دیشامی راهێنەر کە کۆچی دوایی کردبوو.
یەکێتیی فەڕەنسا لە سەرەتا رایگەیاندبوو کە خولەکێک بێدەنگی پێش دەستپێکردنی یارییەکە رادەگەیەنن، بەڵام دواتر روونکرایەوە کە ئەو رێزلێنانەی لەلایەن فیفاوە دیاریکراوە لە راستیدا بۆ قوربانیانی بوومەلەرزە وێرانکەرەکەی ڤێنزوێلا بووە.

کەواتە بۆچی داواکاریی فەڕەنسا رەتکرایەوە و هی ئەرجەنتین قبووڵکرا؟ هۆکارەکەی بۆ یاساکان دەگەڕێتەوە. داواکارییەکەی ئەرجەنتین پەیوەندی بە کەسایەتییەکی تۆپی پێوە هەبوو، لەکاتێکدا داواکارییەکەی فەڕەنسا پەیوەندی بە کۆستی خێزانییەوە هەبوو.

بەگوێرەی یاساکانی فیفا، تەنیا ئەو رێزلێنانانەی پەیوەندییان بە کەسایەتییەکانی تۆپی پێوە هەیە دەتوانن مۆڵەتی تایبەت بۆ بەستنی قۆڵبەندی رەش لە ماوەی کێبڕکێ فەرمییەکاندا وەربگرن و کۆستی خێزانی ناگرێتەوە.

ئانتۆنیۆ راتین کێ بوو؟

ئەنتۆنیۆ راتین، کە بۆ ماوەی 14 ساڵ یاریزانی بۆکا جۆنیۆرز بوو، زیاتر بەهۆی رووداوی دەرکردنی لە یاریی قۆناخی چارەکی مۆندیالی 1966 بەرامبەر ئینگلتەرا لە یادەوەرییەکاندا ماوەتەوە، کاتێک داوای وەرگێڕی کرد تاوەکوو لەگەڵ ناوبژیواندا قسە بکات. ئەو لە سەرەتادا رەتیکردەوە یاریگا جێبهێڵێت و دواتر لەسەر فەرشێکی سوور دانیشت کە بۆ شاژن تەرخانکرابوو، ئەمەش وایکرد ببێتە ئامانجی هاندەرانی ئینگلتەرا. دەرکردنی ئەو وای لە فیفا کرد سیستەمی کارتی زەرد و سوور دابهێنێت، کە تاوەکوو ئەمڕۆش بەکاردێت.