بە شوێنپێی کاگاوا؛ ئەستێرەیەکی لاوی ژاپۆنی لە پەیوەندیکردن بە دۆرتموند نزیکە

یاریگا –

تاکاتۆ یامامۆتۆی ئەستێرەی لاوی ژاپۆنی لە لێواری پەیوەندیکردنە بە بۆرووسیا دۆرتموند.

میدیا ژاپۆنییەکان ئاشکرایان کرد کە تاکاتۆ یامامۆتۆ لە لێواری پەیوەندیکردنە بە تیمی خوار 23 ساڵی بۆرووسیا دۆرتموند ئێستاش میدیا ئەڵمانییەکان و رۆژنامەی Ruhr Nachrichtenـیش پشتڕاستی دەکەنەوە کە بوروسیا دۆرتموند نزیکە لە گرێبەستکردن لەگەڵ لاوەکەی گامبا ئۆساکا. گرێبەستەکە بەشێوەی خواستنی ساڵێک دەبێت و دۆرتموند مەرجی کڕینەوەی ناوەڕاستکارەکەی مسۆگەر کردووە.

چاوەڕوان دەکرێت یامامۆتۆ لە سەرەتادا پەیوەندی بە پێکهاتەی خوار 23 ساڵی بۆرووسیا دۆرتموندەوە بکات، هەرچەندە هەلی ئەوەشی پێدەدرێت کە لەماوەی ئامادەکارییەکانی پێش وەرزدا سەرنجی تیمی یەکەم راکێشێت و چاوەڕوانیش دەکرێت لە کۆتایی مانگی تەممووزدا لەگەڵ تیمی یەکەم گەشت بکات بۆ ئاسیا.

بۆرووسیا دۆرتموند ئامادەیە ریزەکانی خۆی بەم یاریزانە بەهرەمەندەی هێڵی ناوەڕاستی تەمەن 18 ساڵەی گامبا ئۆساکا بەهێزتر بکات.

پێچەوانەی میدیا ئەڵمانییەکان، بەگوێرەی رۆژنامەی Sponichi Annexـی ژاپۆنی، ئۆفەرەکەی یامامۆتۆ لە سەرەتادا بۆ تیمی خوار 23 ساڵی دۆرتموند دەبێت و هیچ مەرجێکی کڕینەوە لە رێککەوتنەکەدا نەهاتووە. گامبا ئۆساکا بە شێوەیەکی کارا پاڵنەری ئەم گواستنەوەی خواستنە بووە بۆ ئەوەی یارمەتی خێراکردنی گەشەسەندنی یامامۆتۆ بدات لە رێگەی رووبەڕووبوونەوەی لەگەڵ ژینگەیەکی تۆپی پێی بەهێزتر و کولتوورێکی جیاوازدا.

بۆرووسیا دۆرتموند بەم دواییانە تیمی خوار 23 ساڵی خۆی بە هێنانی دانیێل سومبو بەشێوەی خواستن لە ستورم گراز بەهێزتر کردووە.

یامامۆتۆ لە رێگەی ئەکادیمیای لاوانی گامبا ئۆساکاوە پێگەیشتووە. ئەم یاریزانە پێ چەپەی هێڵی ناوەڕاست یەکەم یاریی پیشەگەری خۆی لە شوباتی 2026 لە بەرامبەر ئۆکایاما لە خولی J1 Hyakunen Sōz کرد، پێش ئەوەی لە مانگی ئایاردا بۆ یەکەمجار بە شێوەی سەرەکی یاری بکات. تاوەکوو ئێستاش پێنج یاریی بۆ تیمی یەکەم کردووە.

لەسەر ئاستی نێودەوڵەتی، یامامۆتۆ نوێنەرایەتی تیمی نیشتمانیی خوار 19 ساڵی ژاپۆنی کردووە، کە یەک یاریی فەرمی کردوووە و یەک گۆڵی کردووە. هاوکات وەکوو یاریزانێکی بۆ راهێنان لەگەڵ تیمی نیشتمانیی یەکەمی ژاپۆن لەماوەی مۆندیالی 2026 لە ئەمریکای باکوور بەشداربووە.

بە باڵای 1.77 مەتر، یامامۆتۆ وەکوو یاریزانێکی فرەچەشنی هێڵی ناوەڕاستی بەرگری دادەنرێت. خاڵە بەهێزەکانی ئەو بریتین لە: پاسدانی ورد، بڕینی نایاب بە پێی چەپ، یاریی بەرگریی توند و خاوەن سیفەتی سەرکردایەتیی بەهێز. ئەم تایبەتمەندییانە وایانکردووە زۆر کەس وەکوو یەکێک لە یاریزانانی هێڵی ناوەڕاستی بەرگریی نەوەی داهاتووی ژاپۆن سەیری بکەن.

بڕیارە بۆرووسیا دۆرتموند لە کۆتایی مانگی تەممووزدا گەشتێک بۆ ژاپۆن بکات و لەمێژەوە پەیوەندییەکی نزیکی لەگەڵ تۆپی پێی ژاپۆندا پاراستووە. شینجی کاگاوا و میتسورو ماروۆکا پێشتر درێسە بەناوبانگە رەش و زەردەکەیان پۆشیبوو، ئەگەر ئەم گواستنەوەیەش سەر بگرێت، تاکاتۆ یامامۆتۆ دەبێتە یاریزانی داهاتووی ژاپۆنی کە روو لە دۆرتموند دەکات.