ئیسپانی قەدەخە نییە؛ بۆ هەر یارییەک سیستمێکی وەرگێڕانی تایبەت دەبێت

یاریگا –

سیستمێکی وەرگێڕان بۆ هەر یارییەک لەئارادایە کە رەچاووی تیمی بەشداربوو، زمانە فەرمییەکانیان، زمانی راهێنەرەکان و زمانی ئینگلیزی دەکات.

نوێترین دەنگوباسی مۆندیال پەیوەندی بەوەوە هەیە بۆچی زمانی ئیسپانی هەمیشە لە کاتی چالاکییە فەرمییەکانی میدیادا بەکارناهێنرێت، یاخود بە دیاریکراوی، بۆچی ناتوانرێت لە هەموو یارییەکدا بەکاربهێنرێت سەرەڕای ئەوەی پاڵەوانییەتییەکە لە مەكسیک و ویلایەتە یەکگرتووەکان بەڕێوەدەچێت، کە خاوەنی رێژەیەکی زۆری دانیشتووانی ئیسپانی زمانن.

بە پێچەوانەی ئەوەی کە دەگوترێت، هیچ قەدەخەکردنێک لەسەر پرسیارکردن یان وەڵامدانەوە بە زمانی ئیسپانی یاخود هەر زمانێکی دیکە نییە. ئەوەی هەیە سیستمێکە لە رێساکان کە بەستراوەتەوە بە خزمەتگوزارییەکانی وەرگێڕانی بەردەست بۆ هەر یارییەک، ئەمەش لەسەر بنەمای هەڵبژاردە نیشتمانییە بەشداربووەکان و زمانی ئینگلیزی وەکوو زمانی فەرمی فیفا دابینکراوە.

بێگومان، رۆژنامەنووسان دەتوانن بە زمانی ئیسپانی پرسیار لە لویز دێلا فۆینتێ یان لیۆنێل سکالۆنی بکەن کاتێک هەڵبژاردەیەکی ئیسپانی زمان لە یارییەکەدا بێت. لەو دۆخەدا، ئیسپانی دەبێتە یەکێک لە زمانە فەرمییەکانی کۆنفراسی رۆژنامەوانی لەپاڵ زمانی ئینگلیزیدا.

زمانی ئیسپانی بە هیچ شێوەیەک نەکراوەتە ئامانج. لە راستییدا، لە کاتی کۆنفراسی رۆژنامەوانیی جیانی ئینفانتینۆدا، زۆربەی ئەنجامی چالاکییەکە بە زمانی ئیسپانی بەڕێوەچوو. سیستمێکی وەرگێڕان بۆ هەر یارییەک هەیە کە رەچاووی هەر تیمێکی بەشداربوو، زمانی فەرمی، زمانی راهێنەران و زمانی ئینگلیزی دەکات. ئەم سیستمە لە دوای مۆندیالی 2022ـی قەتەرەوە کاری پێدەکرێت.

لە ناوچەی تێكەڵی یاریگا، کە خزمەتگوزاری وەرگێڕانی زارەکی بوونی نییە، هیچ بەربەست و سنووردارکردنێک لەسەر پرسیارکردن یان وەڵامدانەوە بە هەر زمانێک نییە. هەمان شت بۆ کۆنفراسە رۆژنامەوانییە نافەرمییەکانیش بەکاردێت، کە تێیدا هەر فیدراسیۆنێک رێساکانی خۆی دیاری دەکات. بۆ نموونە، فیدراسیۆنی تۆپی پێی ئیسپانیا رێگە بە پرسیارکردن بە هەر زمانێک دەدات و باوە کە میدیا کاتالوونییەکان بە زمانی کەتەلۆنی پرسیار لە یاریزانە ئیسپانییەکان بکەن.

فیفا زمانە بەردەستەکان بەگوێرەی وڵاتی میواندار و تیمەکان، یاریزانان یان راهێنەرە بەشداربووەکان دەستنیشان دەکات. بۆ نموونە، لە یاریی نێوان بەڕازیل و مەغریبدا، خزمەتگوزاری وەرگێڕان بە زمانەکانی ئینگلیزی، عەرەبی، ئیتالی (بەهۆی کارلۆ ئەنچیلۆتی)، فەڕەنسی و پۆرتوگالی بەردەست بوو. پرسیارەکان دەتوانران بە هەر یەکێک لەو زمانانە بکرێن.