هۆشداریی: گەردەلوول کەمپی راهێنانی ئینگلتەرا بۆ مۆندیال دەگرێتەوە

یاریگا –

ئێوارەی رۆژی شەممە، داوا لە تیمی ئینگلتەرا کرا لە ژوورەوە پەنا بگرن دوای ئەوەی هۆشداریی گەردەلوول بۆ بەشێکی زۆری کانزاس سیتی بڵاوکرایەوە.

تەواوی شاندی ئینگلتەرا کەمێک دوای کاتژمێر 8ـی ئێوارە بە کاتی نێوخۆیی ئەمریکا لە رۆژی شەممەدا، نامەی هۆشداریی خودکارانەیان لە رێگەی مۆبایلەکانیانەوە لەلایەن دەزگای نیشتمانیی کەشناسیی ویلایەتە یەکگرتووەکانەوە پێگەیشت، کە پێیانی راگەیاند ‘هۆشداریی رەشەبا و بروسکە’ هەیە و دەبێت پەنا ببەنە بەر باڵەخانەیەکی بەهێز، بەدوور لە پەنجەرەکان، ئەمەش لەبەر ترسی با بە خێرایی زیاتر لە 128 کیلۆمەتر لە کاتژمێرێکدا.

ئەم هۆشدارییە کەمێک دوای کاتژمێر 8:30ـی شەو بەرزکرایەوە بۆ ‘چاودێریی گەردەلوول’ بۆ کەرتی جۆنسن لە کانزاس، کە تیمی ئینگلتەرای لێ دەمێنێتەوە و هۆشدارییەکی توندتری ‘ئاگادارکردنەوەی گەردەلوول’ بۆ کەرتی جاکسن لە میزۆری، کە یاریگای راهێنانی تیمەکەی لێیە و پاشنیوەڕۆی رۆژی شەممە بۆ یەکەمجار راهێنانیان لێی کردبوو. دواتر هەواڵ لەسەر گەردوولێک لە میزۆری درا، بەڵام لە دەرەوەی خودی کانزاس سیتی بوو.

هۆتێل و یاریگای راهێنانی ئینگلتەرا خۆیان بەهۆی خراپترین دۆخی کەشوهەواکەوە زیانیان پێنەگەیشت، ئەگەرچی رووماڵەکەی فۆکس بۆ یاریی سکۆتلەندا لە بەرامبەر هایتی، کە زۆرێک لە کەمپی ئینگلتەرا سەیریان دەکرد، بۆ رووماڵی راستەوخۆی کەشوهەوا گۆڕا.
ئەو با و بارانە بەهێزەی کە ئێوارەی رۆژی شەممە بە کانزاس سیتیدا تێپەڕی، بووە هۆی بڕانی کارەبای زۆرێک لە دانیشتووان. بەڵام لەگەڵ تێپەڕبوونی خراپترین کەشوهەوا لە کانزاس سیتی لە درەنگانی شەوی شەممەدا، ئینگلتەرا هێشتا پلانی هەیە رۆژی یەکشەممە بە شێوەیەکی ئاسایی لە Swope Soccer Village راهێنان بکات، پێش یەکەم یاریی خۆی لە گرووپی L لە بەرامبەر کرواتیا لە دالاس لە رۆژی سێشەممەدا.

کەشوهەوای سەخت بووە هۆی دواکەوتنی چەندین یاریی لە مۆندیالی یانەکانی هاوینی رابردوو لە ویلایەتە یەکگرتووەکان. هۆشداریی زریان بۆ دوو یاریی مۆندیال لە رۆژی یەکشەممەدا هەیە: سوید بەرامبەر تونس لە مۆنتێری و کۆتدیڤوار بەرامبەر ئێکوادۆر لە فیلادلفیا.