پلانەکە تێکدەچێت؛ شۆڕشەکەی هیلال داهاتووی کانسێلۆ لە بارسێلۆنا ئاڵۆز دەکات
دۆسیەی کانسێلۆ پەکخراوە
یاریگا –
دۆسیەی گواستنەوەی هەمیشەیی جواو کانسێلۆ بۆ یانەی بارسێلۆنا تووشی دۆخێکی کتوپڕ و نەخوازراو بووە.
رۆژنامەی سپۆرت بڵاویکردووەتەوە، لە کاتێکدا هەموو شتێک بەرەو کۆتایی دەچوو، گۆڕانکارییەکانی نێو ماڵی یانەی هیلالی سعوودی هاووێشەکەی بە تەواوی گۆڕیوە.
❌ El futuro de Cancelo en el Barça empieza a complicarse
🔜 El Al Hilal podría desprenderse de Inzaghi como técnico y su posible sustituto, el portugués Vitor Pereira, sí contaría con el lateral
✍️ L. Miguelsanzhttps://t.co/eWTrf1wMYW
— Diario SPORT (@sport) June 10, 2026
رێککەوتنی کانسێلۆ و تێکچوونی پلانی هیلال
بارسێلۆنا کارنامەی گواستنەوەی کانسیلۆی وەکوو لەپێشینەیەکی سەرەکی بۆ هێڵی بەرگری وەرزی داهاتوو داناوە. یانە کاتالوونییەکە پێشتر لەگەڵ بەرگریکارە پۆرتوگالییەکە گەیشتبووە رێککەوتنی کۆتایی بۆ واژۆکردنی گرێبەستێکی دوو ساڵە، کانسێلۆش بە تەواوی مووچەکەی خۆی کەمکردبووەوە تاوەکوو لەگەڵ باری دارایی بارسا بگونجێت. بەڵام کێشە ناوخۆییەکانی هیلال پرۆسەکەی راگرت. سیمۆنی ئینزاگی، راهێنەری ئێستای هیلال کە پێشتر کانسێلۆی لە پێکهاتەکەی دوورخستبووەوە، ئێستا لە قۆناخی کۆتایی هەڵوەشاندنەوەی گرێبەستەکەیدایە لەگەڵ یانە سعوودییەکە بەهۆی ناکۆکی لەگەڵ کارگێڕیی نوێدا.
ڤیتۆر پێرێرا؛ بەربەستە نوێیەکەی بەردەم هانزی فلیک
کارگێڕیی هیلال دەیەوێت هاونیشتیمانییەکەی کانسێلۆ، واتە ڤیتۆر پێرێرای راهێنەری ئێستای نۆتینگهام فۆرست بهێنێتە شوێنی ئینزاگی. پێرێرا بە فەرمی بە کارگێڕیی یانەکەی راگەیاندووە کە ئەو دەیەوێت کانسێلۆ لە تیپەکەیدا بمێنێتەوە و پڕۆژەی نوێی لەسەر بنیادبنێت. ئەمەش وایکردووە هیلال داوای کات لە بارسێلۆنا بکات و پەکخستنی دۆسیەکە رابگەیەنێت. بارسا هیوای خواستبوو بە بڕە پارەیەکی کەم یاریزانەکە بکڕێتەوە، بەڵام ئێستا سعودییەکان دەیانەوێت نرخەکەی بەرزبکەنەوە بۆ نزیکەی ئەو 20 ملیۆن یۆرۆیەی کە پێشتر بۆ کڕینی خەرجیان کردبوو.
رۆڵی مێندێش و بڕیاری بارسێلۆنا بۆ چاوەڕوانیکردن
کلیلی چارەسەری ئەم قەیرانە لە دەستی بازرگانی گەورەی یاریزانان، خۆرخێ مێندێشدایە. مێندێش کە لە یەک کاتدا بریکاری کانسیلۆ و راهێنەرە پێشنیارکراوەکە، بە باشی دەزانێت کە کانسێلۆ بە هیچ شێوەیەک نایەوێت بگەڕێتەوە سعوودییە. مێندێش داوای ئارامی و دانبەخۆداگرتنی لە بارسێلۆنا کردووە چونکە دەزانێت پرۆسەکە کاتی زۆری دەوێت.
سەرڕای ئەم کێشانە، بارسێلۆنا هیچ پلان و جێگرەوەیەکی دیکەی نییە؛ ئەوان بڕیاریانداوە تەنانەت ئەگەر تاوەکوو دوای کۆتایی هاتنی یارییەکانی جامی جیهانی 2026 بخایەنێت، چاوەڕێی کانسێلۆ بکەن و ئامادەن لە کاتی پێویستدا ئۆفەرە داراییەکەیان کەمێک بەرزتر بکەنەوە بۆ رازیکردنی هیلال.
