یاریگا –
دی برۆین ساڵی رابردوو وەکوو یاریزانێکی ئازاد پەیوەندی بە ناپۆلییەوە کرد و ئەگەرچی سەرەتایەکی باشی لە ئیتاڵیا هەبوو، بەڵام دواتر ئەم یاریزانە بەلجیکییە بەشێکی زۆری وەرزەکەی بەهۆی پێکانەوە لەدەستدا.
کێڤن دی برۆین لە کۆتاییەکانی وەرزەکەدا گەڕایەوە نێو یاریگاکان و وەرزەکەی بە بەشداریکردن لە 9 گۆڵدا (5 گۆڵ و 4 ئەسیست) لە کۆی 21 یاری لە سەرجەم پاڵەوانییەتییەکاندا کۆتایی پێهێنا. ناوەڕاستکارە بەلجیکییەکە 40 هەلی گۆڵکردنی رەخساند، کە لەنێو هاوتیمەکانیدا تەنیا ماتیۆ پۆلیتانۆ (51 هەلی گۆڵکردن) لەو باشتر بوو، لە کاتێکدا ناپۆلی پلەی دووەمی لە سێریا ئەی بەدەستهێنا.
تەنیا ساڵێک دوای سەرکردایەتیکردنی ناپۆلی بۆ بەدەستهێنانی نازناوەکە، کۆنتی رۆیشت و دی برۆین لە رەخنەگرتن لە راهێنەرە کۆنەکەی سڵی نەکردەوە. ئەو لە چاوپێکەوتنێکدا لەگەڵ پێگەی هێت نیووسبلاد گوتی:
بێگومان بۆ من قورس بوو چونکە کۆنتی خاوەنی دیدگایەکی زۆر جیاواز بوو بۆ تۆپی پێ بەراورد بە من. لە راستییدا، هەرگیز دەرفەتی ئەوەم پێ نەدرا لەو پێگەیەیەدا یاری بکەم کە خۆم ئارەزووم لێیەتی. هەر چۆنێک بێت، من هەمیشە هەوڵم دەدا باشترینی خۆم پێشکەشی تیمەکە بکەم. ئێمە زۆر بە شێوازی بەرگرییانە یاریمان دەکرد. ئەگەر بتەوێت هەموو یارییەک بە جیاوازی یەک گۆڵ و بە پێکهاتەی 4-5-1 ببەیتەوە، ئەوا جۆرێکی دیاریکراو لە تۆپی پێ پێشکەش دەکەی. لە سەرەتای وەرزەکەدا، تەنانەت زیاتریش دەچووینە دواوە. هێرشبەرەکەمان [راسموس هۆیلۆند] تەنیا 12 گۆڵی کرد، بۆیە دەزانیت کە ئامارەکان زۆر ناوازە نابن.
لە درێژەی قسەکانیدا خۆشحاڵی خۆی بە رۆیشتنی راهێنەرەکەیان نەشاردەوە، راشکاوانە قسەی خۆی کرد و گوتی:
بۆ من، بەڵێ [دڵخۆشم کە کۆنتی رۆیشت]. تاوەکوو ئەو شوێنەی پێوەندی بە منەوە هەبێت، ئەو ناچار نەبوو بمێنێتەوە. هاوینی رابردوو بەڵێنی زۆرمان پێدرا سەبارەت بە شێوازی یاریکردنمان، بەڵام لە کۆتاییدا، شتێکی ئەوتۆ جێبەجێ نەکرا. جێگەی داخە، تۆپی پێ دەبێت چێژبەخش بێت، بەڵام بەداخەوە ئەو لایەنە لێرەدا کەمبوو. ئێمە دیدگای جیاوازمان بۆ تۆپی پێ هەبوو. لەژێر سەرپەرشتی کۆنتیدا هەرگیز نەمتوانی لە پێگەی خۆمدا یاری بکەم.
بە گوێرەی راپۆرتەکان، ماسیمیلیانۆ ئالێگری کە سەرەتای ئەم هەفتەیە لە لایەن ئەیسی میلانەوە لە پۆستەکەی دوورخرایەوە، بەربژێری سەرەکییە بۆ گرتنەدەستی پۆستی راهێنەرایەتی ناپۆلی.
لەگەڵ ئەوەشدا، دی برۆین هێشتا لە داهاتووی خۆی لەگەڵ یانەکە دڵنیا نییە و رایگەیاند:
هێشتا یەک ساڵ لە گرێبەستەکەم ماوە، بەڵام دەمەوێت قسەی لەسەر بکەم. ساڵی رابردوو قسەی زۆر کرا لەسەر ئەوەی چۆن یاری دەکەین و چی دەکەین، بەڵام هیچی رووی نەدا.
