پلانێکی نهێنیی پێرێز ئاشکرا دەبێت؛ کەی مۆرینیۆ بۆ ریال مەدرید دەگەڕێتەوە؟

یاریگا –

ئەو بەندەی رێگەی بە جۆزێ مۆرینیۆ دەدات بە سێ ملیۆن یۆرۆ یانەی بێنفیکا جێبهێڵێت، لە 26ـی ئایاردا بەسەر دەچێت.

لە کاتی کۆنگرە رۆژنامەوانییەکەی دوانیوەڕۆی رۆژی سێشەممەدا کە زۆر باسی لێوەکرا، فلۆرێنتینۆ پێرێز خۆی لە وەڵامدانەوەی راستەوخۆی ئەو پرسیارانە بەدوور گرت کە دەربارەی مۆرینیۆ بوون. سەرەڕای ئەوەش، کاتی هەڵبژاردنەکانی سەرۆکایەتی وەکوو ئاماژەیەکی دیکە بۆ پلانەکانی یانەکە دەربارەی راهێنەرە پورتوگالییەکە دەبینرێت.

ئەگەر لە دوو رۆژی داهاتوودا هەڵبژاردنەکان رابگەیەنرێن و وەکوو چاوەڕوان دەکرێت هیچ بەربژێرێکی دیکە نەیەتە پێشەوە، پێرێز لە رۆژی یەکشەممە 24ـی ئایاردا بە فەرمی وەکوو سەرۆک دەمێنێتەوە، تەنیا یەک رۆژ دوای کۆتا یاریی ریال مەدرید لە لالیگا بەرامبەر ئاتلێتیک بلاو. ساتێکی بێخەوشە بۆ راگەیاندنی گەڕانەوەی جۆزێ.

وەکوو پێشتر لەلایەن رۆژنامەی ئاس، بڵاوکرایەوە؛ بەندێک لە گرێبەستی راهێنەرە پۆرتوگالییەکە لەگەڵ بێنفیکا هەیە کە رێگەی پێدەدات بە سێ ملیۆن یۆرۆ یانەکە جێبهێڵێت، تاوەکوو 10 رۆژ دوای کۆتا یاریی بێنفیکا لەم وەرزەدا. ئەو یارییە لە رۆژی شەممە 16ـی ئایار بەرامبەر ئیستۆریل دەبێت و بێنفیکا هێشتا دەرفەتێکی کەمی بۆ گەیشتن بە چامپیۆنزلیگ ماوە.

ئەوە واتە بەندی هەڵوەشاندنەوەی گرێبەستەکەی تاوەکوو 26ـی ئایار بە چالاکی دەمێنێتەوە، تەنیا دوو رۆژ دوای ئەوەی پێرێز بە فەرمی وەکوو سەرۆک پشتڕاست دەکرێتەوە. هەموو شتێک رێک دەبێتەوە.

سەرەڕای ئەوەش، پەیڕەوی نێوخۆی ریال مەدرید دەڵێت کە دەستەی کارگێڕی پێشوو لە سەر کار دەمێننەوە تاوەکوو ئەو کاتەی سەرۆکە نوێیەکە بە فەرمی رادەگەیەنرێت. لە رووی تەکنیکییەوە یانەکە دەتوانێت پێش ئەو کاتە گرێبەستەکە تەواو بکات، بەڵام گونجاو نابێت راهێنەرێکی نوێ دابنرێت پێش ئەوەی وادەی بەربژێرەکانی سەرۆکایەتی بەسەر بچێت.

هەرچەندە بەدوور دەزانرێت، بەڵام هێشتا ئەگەرێکی تیۆری هەیە کە بەربژێرێکی دیکە دەربکەوێت لە هەڵبژاردنەکاندا لە فلۆرێنتینۆ بباتەوە و پاشان ناچار بێت مۆرینیۆ بهێڵێتەوە، تەنانەت ئەگەر هەڵبژاردەی ئەویش نەبێت. هەر بۆیە بەگوێرەی راپۆرتەکە، قرشەکە سپییەکە بە وردی پلانی بۆ بەروارەکان داناوە تاوەکوو هەموو شتێک پێکەوە بگونجێت.