یاریگا –
سپۆتیفای گۆرانیبێژە لاوە ئەمریکییەکەی هەڵبژاردووە بۆ ئەوەی لەسەر درێسی بارسێلۆنا بۆ یارییەکەی بەرامبەر ریال مەدرید دەربکەوێت.
لە تەمەنی 23 ساڵیدا، ئۆلیڤیا رۆدریگۆ سێ خەڵاتی گرامی بەدەستهێناوە و یەکێکە لە ئەستێرە گەشاوەکانی مۆسیقای پۆپ، کە لە دیزنییەوە هاتووە. ئۆلیڤیا لە ساڵی 2019 ناوبانگی دەرکرد کاتێک رۆڵی ‘نینی’ لە High School Musical: The Musical: The Series بینی.
ئەم هەڵبژاردنەی سپۆتیفای لە کاتێکدایە کە خانمەگۆرانیبێژەکە ئامادەکاریی بۆ بڵاوکردنەوەی سێیەمین ئەلبوومی خۆی بە ناوی You Seem Pretty Sad for a Girl So in Love دەکات، کە بڕیارە لە 12ـی حوزەیران بڵاوبکرێتەوە. پێشتر یەکەمین گۆرانی تاکی بە ناوی Drop Dead بڵاوکردووەتەوە و بە شێوەی راستەوخۆ لە کۆچێلا لەگەڵ ئادیسن رای پێشکەشی کردووە.
بارسا دەستی بە ئامادەکارییەکانی کەمپینەکە کردووە، لەوانە وێنەگرتن لەگەڵ یاریزانەکان کە درێسە تایبەتەکەیان پۆشیوە. هەروەها هیوا هەیە کە رۆدریگۆ لە یاریگای سپۆتیفای کامپ نوو ئامادەی یارییەکە بێت.
ئۆلیڤیا پێشتر سەردانی بارسێلۆنای کردووە، کاتێک لە حوزەیرانی 2024 لە Palau Sant Jordi لە میانی Guts World Tour کۆنسێرتی کرد، کە تێیدا گۆرانییە بەناوبانگەکانی وەکوو Vampire و Drivers Licenseـی پێشکەش کرد.
گۆرانیبێژە لاوەکە دەچێتە پاڵ ئەو هونەرمەندانەی دیکە کە لەسەر درێسەکانی بارسا دەرکەوتوون، لەوانە ئێد شیران، درەیک، رۆزالیا، دە رۆلینگ ستۆنز، کارۆل جی، کۆڵدپلەی و تراڤیس سکۆت.
جارێکی دیکە، هاوبەشیی نێوان بارسا و سپۆتیفای تێکەڵەیەکی جیهانی لە تۆپی پێ و مۆسیقا دروست دەکات.
