ریال مەدرید دەگاتە پێشکۆتایی؛ فیگۆ مشتومڕێکی زۆر دروست دەکات

یاریگا –

لویس فیگۆ بۆچوونەکانی خۆی دەربارەی دەرفەتی ریال مەدرید بۆ گۆڕینی ئەنجامی یارییەکە بەرامبەر بایرن میونشن خستەڕوو و قسەکانیشی مشتومڕێکی زۆری دروست کردووە.

ئەستێرەی پێشووی مەدرید دانی بەوەدا نا کە دوای ئەنجامی 1-2 لە یاریی چوون لە بێرنابیۆ ئاڵەنگارییەکە قورسە، بەڵام هێشتا بڕوای بە گەڕانەوە هەیە و دەڵێت:

بە دڵنیاییەوە رووبەڕووبوونەوەیەکی سەختە و ئەنجامی 1-2 ئەنجامێکی قورسە بۆ هەڵگەڕاندنەوە، بەڵام ئەگەر یانەیەک هەبێت گەورەیی و کوالێتی ئەوەی هەبێت ئەو کارە بکات، ئەوە ریال مەدریدە. بەهۆی مێژوویان لەم پاڵەوانییەتییەدا، پێم وایە دەگەنە قۆناخی پێشکۆتایی.

ئەفسانە پۆرتوگالییەکە تیشکی خستەسەر گرنگیی چالاکبوون، بەتایبەتی لە دەرەوەی یاریگای خۆیان و گوتی:

ئەگەر ڤینیسیۆس جونیۆر و کیلیان ئێمباپێ یەکلاکەرەوە بن، بەدەستهێنانی ئەنجامێکی ئەرێنی زۆر ئاسانتر دەبێت، بەڵام خاڵی سەرەکیش کۆنترۆڵکردنی هێزی هێرشبەریی بایرن میونشن و رێگری لە تووشبوون بە ئاستەنگی دەبێت. مەدرید پێویستی بەوەیە بە زووترین کات کۆنترۆڵی یارییەکە بگرێتە دەست.

هەروەها باسی لە نەبوونی ئۆرێلیەن چوامینی کرد، جەختی لەسەر گرنگیی ئەو کردەوە بەڵام متمانەی بە پێکهاتەکە هەبوو و گوتی:

چوامینی بۆ هاوسەنگیی تیمەکە گرنگە، بەڵام مەدرید بژاردەی هەیە بۆ شوێنگرتنەوەی. دەکرێت جود بێڵینگهام بێت؟ پێم وایە. لە یاریی چووندا نیشانیدا کە دەتوانێت گۆڕانکاریی دروست بکات. بە لای منەوە، پێویستە بێڵینگهام هەمیشە لەنێو یاریگا بێت.

پەیامەکەی فیگۆ روونە: سەرەڕای خراپیی ئەنجامەکە، لویس بڕوای وایە ریال مەدرید هەموو پێویستییەکانی هەیە بۆ ئەوەی شەوێکی دیکەی مێژوویی ئەوروپی لە میونشن بخوڵقێنێت.