یاریگا –
لە بەدواداچوونێکی وردی تۆڕی وەرزشی یاریگادا؛ ئاماری یانەکانی کوردستان لە قۆناخی یەکەمی خولی ئەستێرەکان ئاشکرا دەكات
تۆڕی وەرزشی یاریگا لە ڕاپۆرتێکی تایبەتدا، وردەکاری و داتا و ئامارەکانی هەر چوار یانەی کوردستان (هەولێر، زاخۆ، دهۆک، نەورۆز) لە دوای کۆتایی هاتنی قۆناخی یەکەمی خولی ئەستێرەکانی عێراق بڵاودەکاتەوە.
ئەم داتایانە دەریدەخەن کە یانەکانی کوردستان لە نێوان 19 یاری كه كراون، کێبڕکێیەکی توندیان کردووە و ئەنجامی جیاوازیان تۆمارکردووە.
ریزبەندی و خاڵەکان لە کۆتایی قۆناخی یەکەم
لە رووی ریزبەندییەوە، یانەی هەولێر وەک جێگیرترین تیمی یانەکانی کوردستان دەردەکەوێت و لە پلەی چوارەمی خولەکەدایە بە 37خاڵ. یانەی زاخۆ بە 33 خاڵ لە پلەی شەشەمدایە، یانەی دهۆک بە 27 خاڵ لە پلەی دەیەم و یانەی نەورۆزیش بە 22 خاڵ لە پلەی دوازدەهەمی ریزبەندییەکەدایە.
بەهێزترین و لاوازترین هێڵی هێرشبەری و بەرگری
بەپێی ئامارەکانی تۆڕی وەرزشی یاریگا، یانەی زاخۆ بەهێزترین هێڵی هێرشبەری لە نێوان یانەکانی کوردستاندا هەیە بە تۆمارکردنی 26 گۆڵ، لە بەرامبەردا یانەی نەورۆز بە 21 گۆڵ لاوازترین هێڵی هێرشبەری هەیە.
لە رووی بەرگریشەوە، دیسانەوە یانەی زاخۆ بە تۆمارکردنی باشترین ئامار وەک بەهێزترین بەرگری دەردەکەوێت کە تەنیا 15 گۆڵی لێکراوە، لە کاتێکدا یانەی نەورۆز كه 26 گۆڵیان له تۆڕی گۆڵهكهیان كراوه لاوازترین هێڵی بەرگری هەیە و جیاوازی گۆڵەکانی گەیشتووەتە (-5).
قەڵای ناو یاریگا و جەنگی دەرەوەی یاریگا
لە ناو یاریگای خۆیاندا، یانەی زاخۆ تاکە تیمی کوردستانە کە تامی دۆڕانی نەکردووە و لە 9 یاریى نێو یاریگای خۆی پێنج بردنەوە و چوار یەکسانی هەیە.
یانەی هەولێریش لە ناو یاریگای خۆیدا زۆر بەهێز بووە و لە 10 یاریدا حهفت بردنەوەی تۆمارکردووە و تەنیا 9 گۆڵی لێکراوە. بەڵام یانەی نەورۆز خراپترین ئاماری ناو یاریگای هەیە بە شهش دۆڕان لە ناو ماڵی خۆیدا.
لە دەرەوەی یاریگاش، هەولێر بە چوار بردنەوە لە پێشەنگە، لە کاتێکدا یانەکانی تری کوردستان لە دەرەوەی یاریگای خۆیان کێشەی دۆڕانیان هەبووە و دهۆک و زاخۆ و نەورۆز هەر یەکەیان چوار بۆ پێنج دۆڕانیان لە دەرەوەی ماڵ هەیە.
ئەستێرە درەوشاوەکانی یانەکانی کوردستان
لە سهر ئاستی تاکەکەسییەوە، شێرزۆدی هەولێر بە تۆمارکردنی 15گۆڵ نەک هەر گۆڵکاری یانەکەیەتی، بەڵکو گۆڵکاری یەکەمی خولەکەشە.
پیتهر گۆرگیس لە دهۆک بە 10 گۆڵ و ئێچیتا دێپیوتی لە زاخۆ بە حهفت گۆڵ و نیتۆ ئاکارای نهورۆز بە چوار گۆڵ لە ڕیزبەندی گۆڵکارانی یانەکانی خۆیاندان.
لە ڕووی دروستکردنی گۆڵیشەوە، کڵاودیۆ مارادۆنای نەورۆز و پیتهر گۆرگیسی دهۆک و ئەمجەد عەتوانی زاخۆ، هەر یەکەیان بە چوار ئەسیست لە لوتکەدان، هەروەها مستەفا قابیل لە هەولێر سێ ئەسیستی بۆ هاوڕێکانی كردووه.
ئاماری کارتی زهرد و سور
تۆڕی وەرزشی یاریگا بهدواداچوونی بۆ كارته رهنگاو رهنگهكانی یانهكانیش كردووه کە یانەی نەورۆز و هەولێر بە 45 کارتی زەرد زۆرترین كارتیان به رووی یاریزانهكانیان بهرزكراوهتهوه، بەڵام زاخۆ بە وەرگرتنی 5 کارتی سوور زۆرترین سزای ڕاگرتنی بۆ یاریزانەکانی هەبووە.
دهۆک بە 38 کارتی زەرد و چوار سوور لە ریزبەندی ناوەڕاستدایە، و یانەی هەولێریش بە 2 کارتی سوور کەمترین کارتی سووری لە قۆناخی یەکەمدا وەرگرتووە.
بەپێی ئەم داتا وردانە، دەردەکەوێت کە یانەی هەولێر و زاخۆ لە قۆناخی یەکەمدا باشترین نوێنەرایەتی یانەکانی کوردستانیان کردووە و کێبڕکێی چوار گۆشەی زێڕین دەکەن، یانەی دهۆک پێویستی بە جێگیری زیاترە بۆ چوونە ناو ریزبەندی پێشەوە، بەڵام یانەی نەورۆز گەورەترین کێشەی لە هێڵی بەرگری و دۆڕانەکانی ناو یاریگای خۆیدایە کە له قۆناخی دووهم پێویستی بە چارەسەری خێرا هەیە.
