یاریگا –
تۆڕی وەرزشی یاریگا یەکێک لە گەورەترین پڕۆژەکانی ساڵی نوێ رادەگەیەنێت و هەنگاوێکی نوێ لە بواری گەیمینگ دەنێت.
یاریگا ئی سپۆرتس یەکێکە لە پڕۆژە دیارەکانی تۆڕی وەرزشی یاریگا، یاریگا لە ساڵانی رابردوو چەندین چالاکی جیاواز و سەرکەوتووی لە بواری ئی سپۆرتس کردووە، بۆ ساڵی نوێ پڕۆژەکە فراوانتر دەکات و دەرفەتی زێڕین بۆ لاوانی کوردستان دەڕەخسێنێت.
سەردەمی نوێی یاریگا ئی سپۆرتس؛
پێشەوا بەرزنجی، بەناوبانگترین و سەرکەوتووترین یوتویبەری بواری گەیمینگ لە کوردستان لە تۆڕی وەرزشی یاریگا دەستبەکار دەبێت و بزوێنەری پڕۆژە نوێیەکەی یاریگا دەبێت.
یاریگا ئی سپۆرتس دەرفەت دەبەخشێت بە سەرجەم ئارەزوومەندانی بواری گەیمینگ کە چۆن بەیەکەوە بتوانین بوارەکە زیاتر بەرەوپێش ببەین و چی بکەین تاوەکوو بواری گەیمینگ لە کوردستان بە رێچکەیەکی تەندروستدا هەنگاو بنێت.
هاوکات یاریگا ئی سپۆرتس دەبێتە ناوەندێک بۆ دەرخستنی توانای لاوانی بەهرەمەندی نیشتیمان و یاریگا ئامانجییەتی هاوکاری تەواوی ئەو لاوە بەهرەمەندانە بکات کە تاوەکوو ئێستا توانا ناوازەکانیان بە شاراوایی ماوەتەوە و تواناکانیان دەربخات.
دەستپێکی پڕۆژکە چۆن دەبێت؟
لە دەستپێکی پڕۆژەکەدا، یاریگا مانگانە چەند پڕۆگرامێکی تایبەت لە رێگەی پلاتفۆڕمی یوتوبی یاریگا پێشکەش دەکات.
پڕۆگرامەکان لە چوارچێوەی بواری گەیمینگ دەبن و ئامانجمانە لە رێگەی کۆکردنەوەی بەتواناترینەکانی بوارەکە، زانیاری و وردەکاری زیاتر لەبارەی سودەکانی بوارەکە و چۆنیەتی زیاتر بەرەوپێشبردنی بوارەکە لە کوردستان بدەین.