یاریگا –
کیلیان ئێمباپێ کەمپی هەڵبژاردەی فەڕەنسای جێهێشت و ئەمڕۆ لە مەدرید پشکنینی وردی پزیشکی بۆ کراوە.
ئێمباپێ لە یاریی شەوی رابردوو بەرامبەر هەڵبژاردەی ئازەربایجان لە پاڵاوتنەکانی مۆندیالی 2026، گۆڵێکی ناوازەی کرد و بەشداری لە گۆڵێکی دیکەش کرد، لەو یارییەی کەڵەشێرەکان 3-0 براوەبوون.
ئێمباپێ لە خوولەکی 82 بەهۆی پێکان لە قاچی راستی یاریگای جێهێشت، هەرچەندە دیدیێ دیشان دەیزانی پێکانی هەیە و ریسکی پێکرد.
هەڵبژاردەی فەڕەنسا لە بەیاننامەیەکدا بەمشێوەیە باسی پێکانەکەی کرد؛
قاچی راستەی ئێمباپێ پێککرا و نەیتوانی یارییەکە تەواو بکات.
دوای گەڕانەوەی شاندی هەڵبژاردە بۆ ناوەندی کلەیرفۆنتەین، ئێمباپێ قسەی لەگەڵ دیشان کرد و دووپاتیکردەوە، ناتوانێت بەشداری لە یاریی داهاتوو بەرامبەر ئایسلاند بکات.
ئێستا ئێمباپێ لەژێر کۆنتڕۆڵی یانەکەیەتی و هیچ یاریزانێک بۆ شوێنەکەی بانگهێشت ناکرێت.
ئارانشا رۆدریگێز، رۆژنامەنووسی کۆپێ لە پۆستێکی X بڵاویکردووەتەوە، ئێمباپێ ئەمڕۆ پشکنینی پزیشکی لە مەدرید کردووە.
پشکنینی ورد بۆ ئێمباپێ کراوە و لەوە دڵنیابوونەوە کە پێکانەکەی مەترسیدار نییە و هەفتەی داهاتوو لەگەڵ هاوتیمەکان مەشقی بە کۆمەڵ دەکات.
Mbappe ya ha pasado pruebas en Madrid y se descarta lesión grave. Podrá trabajar el grupo la semana que viene.
— Arancha Rodríguez (@AranchaMOBILE) October 11, 2025
