ئەمشەو ئاسۆ رۆستەم لە درێسینگ رووم چیرۆکی یارییەکەی بەرامبەر رۆناڵدۆ دەگێڕێتەوە

یاریگا –

ئەمشەو لە نوێترین ئەڵقەی بەرنامەی درێسنگ رووم لە تۆڕی وەرزشی یاریگا، ئاسۆ رۆستەم چیرۆکی یاریکردنی لە بەرامبەر کریستیانۆ رۆناڵدۆ دەگێڕێتەوە و باسی هەڵبژاردەی عێراقیش دەکات.

ئاسۆ رۆستەم هێرشبەری نەورۆز لە نوێترین ئەڵقەی بەرنامەی درێسنیگ رووم لە تۆڕی وەرزشی یاریگا کە ئەمشەو کاتژمێر 09:00 لە فەیسبووک و یوتیوبی تۆڕی وەرزشی یاریگا پەخش دەکرێت، لەبارەی نەورۆز دەڵێت :’نەورۆز ماڵی منە و من کاتێک یانەکە تووشی قەیران بوو، خەریکبوو بەشداریی خولی ئەستێرەکانی عێراق نەکات، پێمگوتن ئامادەم بێبەرامبەر یاریی بۆ یانەکە بکەم، بەڵام ئەوان رازی نەبوون، من هەمیشە پێش ئەوەی لە یانەیەکەوە بچمە یانەیەکی دیکە دەگەڕێمەوە نەورۆز و پێیان دەڵێم ئێوە منتان دەوێت، ئەگەر پێویستیان بە من بێت من تەنیا لە نەورۆز یاریی دەکەم’.

ئاسۆ لەبارەی رووبەڕووبوونەوەی کریستیانۆ رۆناڵدۆش دەڵێت :’دوای یاریکردن بەرامبەر کریستیانۆ رۆناڵدۆ لە جامی شا سەلمان بە هاوڕێیەکانم دەگوت حەقوایە واز لە یاریکردن بهێنم، هیچی دیکە نەماوە هەوڵی بۆ بدەم، خەریکبوو من بەهۆی کێشەکانم لەگەڵ شوڕتە بەشداریی جامی شا سەلمان نەکەم، بەڵام دواتر بەشدارییم کرد و ئاستێکی بەرزم پێشکەش کرد، بەرامبەر کریستیانۆ رۆناڵدۆ ئاستێکی بەرزم پێشکەش کرد، چونکە لێی نەدەترسام’.

ئاسۆ رۆستەم لەبارەی بانگهێشتکرانی یاریزانانی کورد بۆ هەڵبژاردەی عێراق دەڵێت :’ئێمە کەسمان بەڵگەمان نییە، بەڵام هەموومان گومانمان لەوە هەیە دادپەروەرانە بانگهێشتی یاریزانان ناکرێت و هەندێک یاریزان بانگهێشت دەکرێن شایستەی بانگهێشتکردن نین’.

هێرشبەرەکەی نەورۆز باشترین سێ یاریزانی کورد و هەڵبژاردەی عێراق و خولی ئەستێرەکانی عێراق هەڵدەبژێرێت و چەندان نهێنی دیکەی کاروانی وەرزشی خۆی دەگێڕێتەوە.

درێسینگ رووم بەرنامەیەکی تایبەتی تۆڕی وەرزشی یاریگایە، بۆتان عومەر پێشکەشی دەکات و هەر جارێک لە درێسینگ روومی یاریگایەکی کوردستان و عێراق میوانداریی ئەستێرەیەکی تۆپی پێی کوردستان دەکات و پڕبینەرترین بەرنامەی وەرزشی ئێستای کوردستانە، ئەمشەو کاتژمێر 09:00 نوێترین ئەڵقەی لە فەیسبووک و یوتیوب بڵاو دەبێتەوە.