گۆنزالۆ گارسیا؛ ئەو یاریزانە لاوەی لە ریال مەدرید هەموو شتێکی ئاوەژوو کردەوە

یاریگا –

گۆنزالۆ گارسیا لە بەجێهێشتنی ریال مەدرید نزیکبوو، بەڵام لە مۆندیالی یانەکان هەموو شتێکی ئاوەژوو کردەوە و مانەوەی لە یانەکەی مسۆگەر کردووە، راهێنەرێکی دەڵێت ‘دەتوانێت لە 50 یاری 50 گۆڵ بکات’.

تۆڕی وەرزشی ئاتلێتیک ئاشکرایکردووە، گۆنزالۆ گارسیا هێرشبەری لاوی ریال مەدرید نزیکبوو لە ریال مەدرید بڕوات و رۆیشتنی ئەو هێرشبەرە لاوە لە یانە ئیسپانییەکە چاوەڕوانکراو بوو، کەچی بەهۆی ئاستبەرزیی لە مۆندیالی یانەکان ئەو یاریزانە هەموو بۆچوونەکانی گۆڕیوە.

⚡️Gonzalo Garcia was expected to leave Real Madrid but after a breakout CWC those who know him best at the club are now “almost sure” he will stay

➕”He’s f* sick!”, “he took pachangas with friends like a Champions final”

His story at @TheAthleticFChttps://t.co/iD9OwFNlSj

— Mario Cortegana (@MarioCortegana) June 29, 2025

ماریۆ کۆرتیگانا لە ئاتلێتیک ئاشکرایکردووە، گۆزانلۆ گارسیا لە مۆندیالی یانەکان لە هەر سێ یارییەکەی قۆناخی کۆمەڵەکان سەرەکی بووە، لەژێر سەرپەرشتی چابی ئاڵۆنسۆ دوو گۆڵ و ئەسیستێکی لەو سێ یارییە کردووە و بە ئاستە بەرزەکەی هەمووانی سەرسام کردووە.

رۆژنامەی AS ـی ئیسپانی لە ژمارەی ئەمڕۆ یەکشەممەیدا رایگەیاندووە، ژمارە 9 لە ماڵەوەیە، وەکو ئاماژەیەک گۆنزالۆ گارسیا کە خەریکە بڕیاری ریال مەدرید بۆ گواستنەوەی هێرشبەرێکی ژمارە 9 دەگۆڕێت و یانە مەدریدییەکە بیر لە گواستنەوەی هێرشبەرێکی ژمارە 9 ناکاتەوە.

رۆژنامە مەدریدییەکە راپۆرتێکی لەبارەی ئاست و ئامارەکانی هێرشبەرە لاوەکەی ریال مەدرید بڵاوکردووەتەوە، کە ئەو یاریزانە 21 ساڵانە لە 225 خولەک دوو گۆڵ و ئەسیستێکی کردووە.

ریال مەدرید لە سەرەتای ئەم هاوینە بڕیاریداوە هێرشبەرێکی هاوشێوەی خۆسێلۆ بگوازێتەوە، بەڵام گۆنزالۆ گارسیا خەریکە ئەم بیرۆکەیە دەگۆڕێت و گارسیا دەبێتە یەکێک لە یاریزانە یەدەکەکان بۆ وەرزی داهاتوو، کە ئەو یاریزانە لاوە لە تیپی یەکەمی ریال مەدرید لە 9 یاری 3 گۆڵ و 2 ئەسیستی کردووە.

ئەکرەم کۆنۆر رۆژنامەنووسی ئیسپانی ئاشکرایکردووە، هەریەکە لە سەندەرلاند، رۆما، لیدز یونایتد و ریال ئۆڤیێدۆ چاویان لە گارسیایە و دەیانەوێت ئەو هێرشبەرە ئیسپانییە بگوازنەوە، بەڵام بە رێژەیەکی زۆر لە یانەکەی دەمێنێتەوە.

هێرنان پێرێز راهێنەری پێشووی گارسیا لە لێدوانێکی بۆ رۆژنامەی ئاس دەڵێت :’ئەگەر 50 یاری پشت بە گارسیا ببەستیت، 50 گۆڵت بۆ دەکات’، کە گارسیا لەگەڵ ریال مەدرید کاستییا لە 73 یاری 30 گۆڵ و 7 ئەسیستی کردووە.