دەنگۆكانی مێركاتۆ؛ سۆن لەلایەن سێ یانەوە داواكراوە و بایرن میونشن بەدوای هێرشبەرێكدا وێڵە

یاریگا –

سێ یانەی سعوودی ئەستێرەیەكی تۆتنهامیان دەوێت، بایرن میونشن دوو هێرشبەری پرێمەرلیگ دەكاتە ئامانج و مانچێستەر یونایتد لەگەڵ گۆڵپارێزێک گەیشتە رێككەوتن.

یانەكانی نەسڕ، ئەهلی و قادسیەی سعوودی ئارەزووی خۆیان بۆ گواستنەوەی هیۆنگ مین سۆن ئەستێرەی كۆری یانەی تۆتنهامی ئینگلیزی دەربڕی و ئامادەن 34 ملیۆن پاوەند لە گواستنەوەیدا خەرج بكەن – تۆک سپۆرت.

بایرن میونشن ئەگەر نەتوانێت تواناكانی نیكۆ ویڵیامس بەدەستبهێنێت، ئەوا هەوڵی گواستنەوەی كاۆرو میتۆما یان كۆدی خاكپۆ دەدات – سكای ئەڵمانیا.

مانچێستەر یونایتد بۆ ماوەی وەرزێک گرێبەستی تۆم هیتن گۆڵپارێزی ئینگلیزی یانەكەی نوێدەكاتەوە – فابریزیۆ رۆمانۆ.

گلاسكۆ رەینجەرز هەوڵی بەدەستهێنانی تواناكانی ماكس ئارۆنس بەرگریكاری یانەی بۆرنمس دەدات و یانە ئینگلیزیەكەش دەیەوێت بە هەمیشەی دەستبەرداری یاریزانەكەی ببێت نەک بە خواستن – دەیلی ریكۆرد.

یانەی میلوۆڵ ئامادەیە گرێبەستی زاک ستێرج یاریزانی یانەی چێڵسی بكاتە هەمیشەیی كە وەرزی رابردوو بە خواستن یاریی بۆ ئەو یانەیە كرد – دەیلی ئێكسپرێس.

ئەیسی میلان لەگەڵ نوێنەرانی بایەر لیڤەركوزن بۆ گواستنەوەی گرانیت چاكا كۆبووەوە – فوتبۆڵ ئیتاڵیا.

ناپۆلی هەوڵی بەدەستهێنانی تواناكانی جەیدن سانچۆ ئەستێرەی ئینگلیزی یانەی مانچێستەر یونایتد دەدات، دوای ئەوەی وەرزی رابردوو كە بە خواستن یاریی بۆ چێڵسی دەكرد نەیتوانی سەركەوتووبێت – دی مارزیۆ.

نۆتینگهام فۆرێست هەوڵی گواستنەوەی ریچارد ریۆس ناوەڕاستكاری كۆڵۆمبی یانەی پالمێراسی بەڕازیلی دەدات و بڕی هەڵوەشاندنەوەی گرێبەستی یاریزانەكە 85 ملیۆن پاوەندە – گیڤ می سپۆرت.