یاریگا –
راپۆرتە رۆژنامەوانیەكانی ئینگلتەرا ئاشكرایانكرد یانەی ئارسیناڵی ئینگلیزی هەوڵەكانی بۆ گواستنەوەی نیكۆ ویلیامس ئەستێرەی ئیسپانی یانەی ئاتلێتیک بیلباوی هەمان وڵات دەستپێكردووە.
نیكۆ ویلیامس گرێبەستەكەی لەگەڵ ئاتلێتیک بیلباو لە هاوینی ساڵی 2027 بەسەردەچێت.
لەم وەرزەدا ئارسیناڵ بەهۆی پێكانی یەک لە دوای یەكی یاریزانەكانیەوە بەتایبەت هێرشبەرەكانی، لە بردنەوەی نازناوی پرێمەرلیگ بێ هیوا بووە و هەر بۆیە دەیەوێت لە مێركاتۆی داهاتوودا ریزەكانی پتەوتر بكات.
بەگوێرەی زانیارییەكانی گاردیان، ئارسیناڵ گواستنەوەی نیكۆ ویلیامس دەكاتە ئامانج و دەیەوێت لە گواستنەوەكانی هاوینەی داهاتوودا بیگوازێتەوە ریزەكانی.
بەگوێرەی هەمان سەرچاوە، ئاندریا بێرتا بەڕێوەبەری وەرزشی نوێی ئارسیناڵ لەگەڵ بەڕێوەبەری كارەكانی هێرشبەرە 22 ساڵانەكە كۆبووەتەوە.
بڕی هەڵوەشاندنەوەی گرێبەستەكەی نیكۆ لەگەڵ بیلباو 60 ملیۆن یۆرۆیە.
لە دوای مارتن زوبیمێندی نیكۆ ویلیامس دووەم ئامانجی هاوینی داهاتووی تۆپهاوێژەكانە.
لە گواستنەوەكانی هاوینی رابردوودا بارسێلۆنا بە توندی هەوڵی گواستنەوەی نیكۆ ویلیامسی دەدا، بەڵام لە كۆتاییدا یاریزانەكە رەتیكردەوە پەیوەندی بە بارساوە بكات و مانەوەی لە بیلباو هەڵبژارد.
لەم وەرزەدا هێرشبەرە ئیسپانییەكە بەشداری 38 یاریی كردەوە، توانیویەتی نۆ گۆڵ بكات و حەوت گۆڵیش دروست بكات.
