یاریگا –
هانزی فلیک، راهێنەری ئەڵمانی یانەی بارسێلۆنای ئیسپانی باس لە بردنەوەكەیان بەرامبەر ئاتلێتیكۆ مەدرید دەكات.
شەوی رابردوو ئاتلێتیكۆ مەدرید لە یاریگای خۆیدا میوانداری بارسێلۆنای كرد و یارییەكەش بە بردنەوەی یانەی میوان بە گۆڵێكی بێ بەرامبەر كۆتایی هات، لە میانی یاریی گەڕانەوەی قۆناخی پێشكۆتایی جامی شای ئیسپانیا.
بەوەش بارسێلۆنا خۆی گەیاندە یاریی كۆتایی و لەو یارییەشدا رووبەرووی ریال مەدرید دەبێتەوە، ئاتلێتیكۆش ماڵئاوایی كرد.
لە دوای یارییەكە هانزی فلیک گوتی:
ئاسان نییە دوو یاریی لەسەر یەك لەو یاریگایەدا لە ئاتلێتیكۆ مەدرید ببەیتەوە، بەهۆی بیركردنەوەی یاریزانەكانەوە لەوەدا سەركەوتوو بووین.
زانیمان چۆن تاوەكو كۆتایی بەرگری بكەین، زۆر دڵخۆشم و شانازی بە یاریزانەكانمەوە دەكەم كە توانیان پارێزگاری لە خاوێنی تۆڕی گۆڵەكە بكەن. ئەوە كارێكی ئاسان نییە چونكە ئاتلێتیكۆ یەكێكە لە باشترین یانەكانی ئەوروپا.
پێوویستە سەرەتا سەرنجمان لەسەر راهێنانەكان بێت، راهێنانەكان بۆ یاریی داهاتوو دەستپێدەكەینەوە، پێوویستە هەمووان لە بارسێلۆنا شانازی بەو یاریزانانەوە بكەن.
داوام لە ئێریک گارسیا كرد بمێنێتەوە، چونكە دەرفەتی یاریكردن دێتە پێشی، ئەوەیكرد، ئێستا لە چەند شوێنێكدا چانسی یاریكردنی هەیە، ئەو یاریزانێكی گەورە و پیشەگەرێكی نایابە.
جارێ بیر لە كلاسیكۆی یاریی كۆتایی ناكەمەوە چونكە زۆری ماوە، سەرنجم تەنیا لەسەر یاریی داهاتووە.
چاوەڕوان دەكرێت رۆژی 26 مانگ بارسێلۆنا و ریال مەدرید لە یاریی كۆتایی جامی شای ئیسپانیا رووبەڕووی یەک ببنەوە.
