یاریگا –
لیژنەی بێلایەنی تایبەت رێکخستنەکانی سەربە یەکێتی تۆپی پێی ئینگلتەرا بڕیارێکی گرنگی لە بەرژەوەندیی یانەی ئارسیناڵ راگەیاند پێش یاریی لووتکەی پرێمەرلیگ کە یەکشەممەی هەفتەی داهاتوو گەنەرز پێشوازیی لە مانچێستەر سیتی دەکات.
تۆپچییەکان لە یاریی رابردوویاندا بەرامبەر وڵڤرهامپتن زیاتر لە گێمێک بە یاریزانێک کەمترەوە یارییان کرد کاتێک لە خولەکی 43 ئۆلیڤەری ناوبژیوانەوە لێویس سکێڵی بەرگریکاری چەپ بە کارتی سوور کرایەدەرەوە دوای ئەنجامدانی فاوڵێک.
کارتە سوورەکە چ لەناو یاریگا و چ لە دەرەوە دوای یارییەکە کاردانەوەی میکێل ئارتێتا و یاریزانەکانی لێکەوتەوە و کرانەدەرەوەی ئەو یاریزانە 18 ساڵانەیان بە ناشاییستە زانی. هەربۆیە تانەیان لە دژی بڕیارەکەی ئۆلیڤەر تۆمارکرد.
بەگوێرەی راگەیەندراوێک کە یانە لەندەنییەکە لە پێگەکانی خۆیەوە بڵاویکردووەتەوە، لیژنەی تایبەتمەند بڕیاریداوە کارتەکەی سەر لێویس بسڕدرێتەوە.
ئەوە خزمەتێکی گەورەبوو بە ئارتێتا، بەوپێیەی ئەگەر بڕیارەکە جێبەجێبکرایە، ئەوە سکێڵی دەبوو لە سێ یاریی داهاتووی گەنەرز بێبەبش بێت. ئەو یارییانەش بەرامبەر مان سیتی لە پرێمەرلیگ، جامی کاراباو بەرامبەر نیوکاسڵ و جارێکیتر لێستەر سیتی هەر لە پرێمەرلیگ.
FA statement on Myles Lewis-Skelly red card
— Arsenal (@Arsenal) January 28, 2025
دوای 23 هەفتە لە یارییەکانی خولی ئینگلیزی، ئارسیناڵ بە کۆکردنەوەی 47 خاڵ لە پلەی دووەم دێت و سیتیزنیش 41 خاڵی هەیە و لە پلەی چوارەمە.
