تایبەت بە یاریگا؛ یاریزانێکی پیشەگەر ریزەکانی نەورۆز بەجێدەهێڵێت

یاریگا –

دانیێل کامی بەرگریکاری کامیرۆنی ریزەکانی یانەی نەورۆز بەجێدەهێڵێت و چیدیکە درێسە سپییەکەی نەورۆز ناپۆشێتەوە.

تۆڕی وەرزشی یاریگا زانیویەتی، دانیێل کامی بەرگریکاری کامیرۆنی ریزەکانی یانەی نەورۆز بەجێدەهێڵێت کە هاوینی رابردوو ئەو بەرگریکارە 28 ساڵانە لە خولی بولگارییەوە پەیوەندی بە ریزەکانی نەورۆز کرد، لەم وەرزەی خولی ئەستێرەکانی عێراق بەشداریی 16 یاریی یانەکەی سلێمانی کرد.

یانەی نەورۆز لە مێرکاتۆی زستانە تاوەکو ئێستا بەفەرمی گرێبەستی هەریەکە لە محەمەد زامل، محەمەد زریقات، ئەحمەد خالید، حەسەن عەباس و گاسوچ پانۆم بۆ ریزەکانی راگەیاندووە، رۆیشتنی هەریەکە لە چۆمان مەحموود، هاوکار جەمال، ئەیاد عەبد، محەمەد تەقی و ئینتێرس گوێی لە یانەکەشی راگەیاندووە.

دەرگای گواستنەوەی زستانەی یاریزانان رۆژی 5ـی فێبرایەر/شووباتی ئەمساڵ لە عێراق دادەخرێت، کە رۆژی 5ـی ئەم مانگە کرایەوە.