بایرن میونشن لە ئامانجێكی بارسێلۆنا نزیک دەبێتەوە

یاریگا –

راپۆرتە رۆژنامەوانیەكان ئاشكرایانكرد، یانەی بایرن میونشنی ئەڵمانی لە گواستنەوەی نیكۆ ویلیامس ئەستێرەی ئیسپانی یانەی ئاتلێتیک بیلباو نزیک دەبێتەوە.

نیكۆ ویلیامس لە هاوینی ساڵی 2021 لە تیمی دووەمی بیلباوەوە بۆ تیمی یەكەم بەرزكرایەوە.

لە گواستنەوەكانی هاوینی رابردوودا بارسێلۆنا لە گواستنەوەی ویلیامس نزیك بووەوە، بەڵام یاریزانەكە رەتیكردەوە ریزەكانی بیلباو جێبهێڵێت.

گرێبەستەكەی نیكۆلاس ویلیامسی تەمەن 22 ساڵان لەگەڵ بیلباو لە هاوینی ساڵی 2027 بەسەردەچێت.

بە گوێرەی زانیارییەكانی رۆژنامەی موندۆ دێپۆرتیڤۆی ئیسپانی، نیكۆ ویلیامس بەردەوامە لە راكێشانی سەرنجی یانە بەهێزەكانی ئەوروپا، بۆیە ئەگەرێكی زۆر هەیە لە گواستنەوەكانی هاوینی داهاتوودا ریزەكانی ئاتلێتیک بیلباو جێبهێڵێت.

ئاماژە بەوەشكراوە، لە گواستنەوەكانی هاوینی رابردوودا یاریزانە ئیسپانیەكە ناوێكی دیاری بازاڕی گواستنەوە بوو، بارسێلۆنا و یانە گەورەكانی دیكە ئارەزووی گواستنەوەیان دەكرد، بەڵام هیچ یانەیەک بڕی هەڵوەشاندنەوەی گرێبەستەكەی كە 60 ملیۆن یۆرۆیە بە یانە ئیسپانیەكە نەدا، هەر بۆیە لە ئاتلێتیک بیلباو مایەوە.

لە راپۆرتەكەشدا هاتووە، یانەی بایرن میونشن ناوی نیكۆ ویلیامسی لە سەرووی ئەو یاریزانانەوە داناوە كە دەیەوێت لە وەرزی داهاتوو گریبەستیان لەگەڵ واژۆ بكات، وە ئامادەیە بەهای 60 ملیۆن یۆرۆ كە هەڵوەشاندنەوەی گرێبەستەكەیەتی بە ئاتلێتیک بیلباو بدات.

لەم وەرزەدا نیكۆ ویلیامس لەگەڵ بیلباو بەشداری لە 23 یاریی كردەوە توانیویەتی دوو گۆڵ بكات و پێنج گۆڵیش درووست بكات.