یاریگا –
گاری لینیکەر بەنیازە واز لە کاری پێشکەشکاری بەرنامەی ‘Match Of the Day MOTD’ی کەناڵی بی بی سی بهێنێت.
تۆڕی هەواڵ BBC بڵاویکردووەتەوە، لینیکەر نایەوێت گرێبەستەکەی لەگەڵ تۆڕەکە نوێبکاتەوە و لە دوای تەواوبوونی ئەم وەرزە، واز لە بەرنامەکە دەهێنێت و دوای تەواوبوونی مۆندیالی 2026، بە تەواوی لە تۆڕەکە دەکشێتەوە.
لینیکەر لە ساڵی 1999ەوە پێشکەشکاری بەردەوامی بەرنامەی MOTD بووە، پێدەچێت دوای وازهێنانی، گۆڕانکاری گەورە لە بەرنامەکە رووبدات. بەگوێرەی راپۆرتەکان بێت، مووچەی ساڵانەی لینیکەر بریتییە لە 1.3 ملیۆن پاوەند، بەڵام لە دوای نوێکردنەوەی گرێبەستەکەی بۆ ماوەی 18 مانگ، مووچەکەی کەمکراوەتەوە.
لینیکەر لە مارس/ئاداری ساڵی 2023، هێرشێکی توندیکردە سەر حکومەتی بەریتانیا ‘پارتی پارێزگاران’، ئەمەش بەهۆی سیاسەتی حکومەتەکە لە دژی پەنابەران.
پۆستەکەی لە تۆڕی کۆمەڵایەتی X کاردانەوەی جیاوازی دروستکرد و تۆڕی BBC ناچار بۆ ماوەیەک لە بەرنامەکە دووریبخاتەوە.
