یاریگا –
ئێرلینگ هالاند، لەوانەیە ئێستا باشترین هێرشبەری جیهان بێت، بەڵام ئامادەی رێوڕەسمی شەوی رابردووی دابەشکردنی خەڵاتەکانی فرانس فووتبۆڵ لە پاریس نەبوو.
هالاند لە دوای تەواوبوونی یارییەکانی گەڕی نۆیەمی پرێمەرلیگ، بڕیاریدا گەشتی سوێد بکات و ئامادەی یاریی تۆپی پێی هاوڕێیەکی نزیک ببێت و بەشداری لە رێوڕەسمی خەڵاتی باڵۆن دۆر نەکات.
هالاند بۆ پاڵپشتیکردنی ئێریک بۆتیم، یاریزانی سوێدی و یانەی مالمۆ گەشتی وڵاتە سکێندەناڤییەکەی کردبوو و لە یاریی نێوان مالمۆ و گۆتێنبورگ ئامادەبوو.
هالاند و بۆتیم بەیەکەوە یاریزانی هەڵبژاردەی تازەپێگەیشتووانی نەرویج بوون، بەڵام دواتر لەیەکتر جیابوونەوە و بۆتیمی هاوڕێی بووە یاریزانی هەڵبژاردەی سوید.
هالاند لە وەرزی رابردوودا 27 گۆڵی لە کۆی 31 یاریدا کرد و نازناوی پرێمەرلیگی لەگەڵ مانچێستەر سیتی بردەوە. ساڵی رابردوو پلەی دووەمی خەڵاتی باڵۆن دۆری لە دوای لیۆنێل مێسی بەدەستهێنا.
