تەواو؛ بارسێلۆنا لەگەڵ لامین یامال رێکدەکەوێت

یاریگا –

بارسێلۆنا گرێبەستی لامین یامال بۆ ماوەیەکی درێژ نوێدەکاتەوە.

رۆژنامەی موندۆ دیپۆرتیڤۆ بڵاویکردووەتەوە، بارسێلۆنا لەگەڵ لامین یامال گەیشتووەتە رێککەوتنی زارەکی و گرێبەستی ئەستێرە لاوەکە تاوەکو هاوینی 2030 نوێدەکاتەوە.

بەهرەمەندە تەمەن 17 ساڵانییەکە تاوەکو هاوینی 2026 گرێبەستی لەگەڵ یانە کاتالۆنییەکە هەیە، بەگوێرەی زانیارییەکانی رۆژنامە ئیسپانییەکە، هەردوولایەن رێککەوتوون هەرکاتێک یامال تەمەنی بووە 18 ساڵ، راستەوخۆ گرێبەستەکەی تاوەکو 2030 نوێدەکرێتەوە.

ئەم هەنگاوەی بارسا بۆ پارێزگاریکردنە لە تواناکانی یاریزانەکە، چونکە پاریس سانجێرمان هەوڵەکانی بۆ گواستنەوەی چڕکردووەتەوە و کاتالۆنییەکانیش نایانەوێت هەمان سیناریۆی نێیمار دا سیلڤا دووبارە ببێتەوە.

یامال لە ئەکادیمیای لاماسیا پێگەیشتووە، لە هاوینی 2023 بۆیەکەمجار بۆ تیپی یەکەمی یانەکە سەرخرا، بە درێسی بارسێلۆنا لە سەرجەم پاڵەوانێتییەکان بەشداری 62 یاریی کردووە، 12 گۆڵی کردووە و 14 گۆڵی دروستکردووە. نازناوێکی لالیگاشی بەدەستهێناوە.