یاریگا –
ئەمڕۆ ریال مەدریدی پاڵەوانی وەرزی رابردووی لالیگا لە پێنجەم یاری وەرزی نوێدا رووبەرووی ریال سۆسێداد دەبێتەوە.
وا بڕیارە ئەمڕۆ شەممە كاتژمێر 22:00 بە كاتی كوردستان ریال سۆسێداد لە یاریگای ئانوێتای تایبەت بە خۆی میوانداری ریال مەدرید بكات، لە میانی یارییەكانی هەفتەی پێنجەمی لالیگای ئیسپانیا.
پڕۆفایلی یاری
ریال مەدرید لە وەرزی نوێی لالیگادا دوو یاری لە دەرەوەی یاریگای خۆی كردووە، لە هەردوو یارییەكەدا یەكسان بووە و نەیتوانیوەی بردنەوە بەدەستبهێنێت، لە یەكەم یاریدا لە یاریگای مایۆركا رووبەرووی ئەو یانەیە بوویەوە و یارییەكەش بە گۆڵێك بۆ هەردوولا یەكسان بوون، لە هەفتەی سێیەمی لالیگاشدا لە دەرەوەی یاریگای خۆی رووبەرووی لاس پاڵماس بوویەوە و بە هەمان ئەنجام یارییەكە كۆتایی هات.
پاڵەوانی وەرزی رابردووی لالیگا دوو یاری لە نێو یاریگای خۆی بەرامبەر یانەكانی ڤایادۆلید و ریال بێتیس كردووە و لە هەردوو یاریدا براوە بووە.
یانە شاهانەكە بە كۆكردنەوەی هەشت خاڵ لە پلەی دووەمی ریزبەندی دێت و بە جیاوازی چوار خاڵ لە بارسێلۆنای پێشەنگ دوورە.
لە بەرامبەردا ریال سۆسێداد كە بەشداری یارییەكانی وەرزی نوێی یۆرۆپالیگ دەكات، دەستپێكێكی خراپی لەم وەرزی لالیگا هەبووە و بە جۆرێك لە چوار یاریدا تەنیا چوار خاڵیان كۆكردووەتەوە.
هەواڵی پێكانی یاریزانەكان
دوای پێكانەكەی ئۆیارزابال لە یاری هەڵبژاردەكەی چاوەڕوان دەكرێت یاریزانەكە بەشێوەیەكی ئاسایی بۆ یارییەكە ئامادە بێت.
هەریەك لە یاریزانان برایس مێندێز، هاماری تراۆر، ئارتێنز ئێلوستۆندۆ و ئارسین زاخاریان ناتوانن بەشداری یارییەكەی بەرامبەر ریال مەدرید بكەن.
هەروەها ئالڤارۆ ئۆریۆزۆلا گومانی بەشداریكردنی بەرامبەر یانەكەی پێشووی لەسەرە.
لەبەرامبەردا ریال مەدرید بەهۆی زۆری پێكانی یاریزانەكانیەوە دەناڵێنێت و هەریەك لە یاریزانان دەیڤد ئالابا، كاماڤینگا ، دانی سێبایۆس، ئۆرێلیەن چوامینی و جود بێڵینگهام ناتوانن بەرامبەر ریال سۆسێداد بەشداری بكەن.
پێکهاتەی پێشبینیکراو
ریال سۆسێداد
ریمیرۆ
خاڤی لۆپێز، نایف ئاگرد، زوبیلدیا، ئۆدریۆزۆلا
سوچیچ، زوبیمێندی، ئیماز
كوبۆ، ئۆسكارسۆن، سێرجی گۆمێز
ریال مەدرید
كۆرتوا
كارڤاخال، میلیتاو، رودیگەر،مێندی
ڤاڵڤێردی، مۆدریچ، گولەر
رۆدریگۆ، ئێمباپێ، ڤینیسیۆس
ریال مەدرید و ریال سۆسێداد پێشتر 175 جار رووبەڕووی یەك بوونەتەوە لە 96 یاری مەدرید براوە بووە و لە 37 یاریش سۆسێداد و لە 42 یاری یەكسان بوون.
یانە شاهانەكە لە رووبەڕووبوونەوەكانی نێوانیان 359 گۆڵی كردووە و سۆسێدادیش 217 گۆڵ.
