ئەو یاریزانانەی بەهۆی ڤایرۆسی فیفاوە تووشی پێکان بوون و لە یانەکانیان دادەبڕێن

یاریگا –

لە ماوەی 10 رۆژی رابردوودا لە یارییە نێودەوڵەتییەکان بەشێک لە یانەکان بەهۆی ڤایرۆسی فیفاوە لە تواناکانی چەند ئەستێرەیەکیان بێبەش دەبن، چەند ئەستێرەیەک بە پێکانەوە گەڕانەوە یانەکانیان کە ریال مەدرید و ئارسیناڵ زەرەرمەندترین یانە بوون لە پشووی یارییە نێودەوڵەتییەکانی ئەمجارە.

هەریەکە لە فێرلاند مێندی و ئۆریلێن چوامێنی لەگەڵ فەڕەنسا و ئیدێر میلیتاو لەگەڵ بەڕازیل تووشی پێکان بوون و لە ریال مەدرید دادەبڕێن، یانە ئیسپانییەکە لە پشووی یارییە نێودەوڵەتییەکانی ئەمجارە زەرەرمەندترین یانە بوو.

ئارسیناڵیش بەهۆی ڤایرۆسی فیفاوە دوو لێدانی کوشندەی بەرکەوت، ریکاردۆ کالافیۆری بەرگریکاری ئیتاڵی و مارتن ئۆدیگارد ناوەڕاستکاری نەرویجی لەگەڵ هەڵبژاردەکانیان تووشی پێکان بوون، بەرگریکارە ئیتاڵییەکە هەرزوو کەمپی هەڵبژاردەکەی بەجێهێشت و ئۆدیگاردیش لە پاژنەپێی تووشی پێکانێکی سەخت بوو، دارەشەقە گەڕایەوە لەندەن.

هەریەکە لە دانی ئۆلمۆ و فێرمین لۆپێز لەگەڵ هەڵبژاردەی ئیسپانیا تووشی پێکان بوون و بە پێکراییەوە گەڕانەوە بارسێلۆنا، ناتان ئاکێ بەرگریکاری هۆڵەندیش نوێترین قوربانی ڤایرۆسی فیفایە بەمهۆیەوە لە مانچێستەر سیتی دادەبڕێت.

ناتان ئاکێ – مانچێستەر سیتی

مارتن ئۆدیگارد – ئارسیناڵ

ریکاردۆ کالافیۆری – ئارسیناڵ

دانی ئۆلمۆ – بارسێلۆنا

فێرمین لۆپێز – بارسێلۆنا

ئۆرێلین چوامێنی – ریال مەدرید

ئیدێر میلیتاو – ریال مەدرید

فێرلاند مێندی – ریال مەدرید