یاریگا –
رەحیم ستێرلینگ ئامادەیە پەیوەندی بە مانچێستەر یونایتد بکات، بەڵام نایەوێت هیچ هەنگاوێکی ئاشکرابکات، تاوەکو بە تەواوی لە دۆخی گرێبەستەکەی لەگەڵ چێڵسی تێنەگات.
رۆژنامەی تێلێگراف بڵاویکردووەتەوە، ستێرلینگ و چێڵسی لەم چەند رۆژەدا، گفتوگۆی زیاتر لەسەر ئەگەرەکان دەکەن، چونکە هێشتا سێ ساڵ بۆ بەسەرچوونی گرێبەستەکەی ماوە و مووچەی هەفتانەی بریتییە لە 300 هەزار پاوەند.
مانەوەی ستێرلینگ لە چێڵسی، وەرگرتنی 40 ملیۆن پاوەند گەرەنتیکراو دەبێت، بۆیە دەیەوێت مافەکانی دارایی بە گواستنەوەی بۆ مان یونایتد نەفەوتێت.
ستێرلینگ ئامادەیە ستامفۆرد بریج جێبهێڵێت، چونکە چیدیکە لە یانەکە دڵخواز نییە، بەڵام رەحیم نایەوێت بە ئاسانی دەست لە دەیان ملیۆن پاوەند هەڵگرێت.
چێڵسی دەیەوێت جەیدن سانچۆ، یاریزانی مانچێستەر یونایتد تێهەڵکێشی گرێبەستەکە بکات، بەڵام هیچ بەرەوپێشچوونێک لە بابەتەکە رووینەداوە.
ستێرلینگ لە ساڵی 2015 لە لیڤەرپوولەوە پەیوەندی بە مانچێستەر سیتی کرد، لەگەڵ سیتی چوار نازناوی پرێمەرلیگی بردەوە و پاشان لە ساڵی 2022 بە بڕی 47.5 ملیۆن پاوەند پەیوەندی بە چێڵسییەوە کرد.
