هەواڵێکی ناخۆش لە تریپیێرەوە بۆ هاندەرانی نیوکاسڵ یونایتد
''بەدوای شوێنگرەوەیەک دەگەڕێن''
یاریگا –
کیران تریپیێر دەیەوێت نیوکاسڵ یونایتد جێبهێڵێت.
تۆڕی ئاتلێتیک بڵاویکردووەتەوە، تریپیێر بە دەستەی کارگێڕی یانەکەی راگەیاندووە، دەیەوێت بەر لە داخرانی دەرگای گواستنەوەکانی ئەم هاوینە، قەڵای سەینت جەیمس پارک جێبهێڵێت.
تریپیێر لە ساڵی 2022 پەیوەندی بە یانەکەی تاینسیسایدەوە کرد، لەو ساتەوە رۆڵێکی باڵای لە یانەکە گێڕا و بووە کاپتنی تیمەکە.
🚨 EXCL: Kieran Trippier wants to leave Newcastle United before summer market closes + Everton among suitors. 33yo full-back contracted until 2026 but seeking regular 1st team action elsewhere. #EFC in contact with #NUFC to explore loan move @TheAthleticFC https://t.co/HyF2h6YrdC
— David Ornstein (@David_Ornstein) August 22, 2024
لە یاری کردنەوەی وەرزی نوێی پرێمەرلیگ، تریپیێر یاریزانی یەدەکی یارییەکەی بەرامبەر ساوسامتن بوو، ئێدی هاو، راهێنەری ماگپایس، یاری بە تینۆ لیڤرامێنتۆ لە شوێنی تریپیێر کرد.
مانگی داهاتوو تەمەنی بەرگریکاری پێشووی ئاتلێتیکۆ مەدرید و تۆتنهام هۆتسپێرز دەبێتە 34 ساڵ و هێشتا دوو ساڵ بۆ بەسەرچوونی گرێبەستەکەی ماوە، بەڵام بەگوێرەی زانیارییەکانی ئاتلێتیک، تریپیێر بێزار بووە.
لە سەرەتای بازاڕی گواستنەوەی هاوینەدا، ئێڤەرتن گفتوگۆی سەرەتایی لەگەڵ تریپیێردا کرد. یانەکەی مێرسیساید نیازی گواستنەوەی کیرانی بە خواستن هەبوو، بەڵام گفتوگۆکان وەستان.
پێشتر تریپیێر و شۆن دایچ، راهێنەری ئێڤەرتن لە ساڵانی نێوان 2012-2015 بەیەکەوە لە بێرنلی کارییان کردووە.
لە بازاڕی گواستنەوەی زستانەی رابردوودا، بایرن میونشن هەوڵی زۆری بۆ گواستنەوەی تریپیێردا، بەڵام نیوکاسڵ بیرۆکەی دەستبەرداربوون لە تواناکانی کیران، قبووڵ نەکرد.
