یانەیەکی دەرەوەی پرێمەرلیگ رێککەوتنی سەرەتایی لەسەر گواستنەوەی سانچۆ کردووە

یاریگا –

وا دیارە رێگەی گەڕانەوە بەرەو ئۆڵدترافۆرد بۆ جەیدن سانچۆ قورس بووە و مانچێستەر یونایتد هەلی پێناداتەوە.

سانچۆ کە زستانی رابردوو بە خواستن نێردرایە ریزەکانی بروسیا دۆرتمۆند دوای تەقینەوەی کێشەکانی لەگەڵ ئێریک تێن هاخ، لە ریزی یانەکەی پێشووی توانی ئاستی راستەقینەی خۆی پیشان بداتەوە. ئەوەیش وایکرد جگە لە مان یو، یانەکانی تریش پێی سەرسامبن.

ئەگەرچی لە چەند رۆژی رابردوودا وێنەکان لە شوێنی راهێنانە ئامادەکارییەکان بۆ وەرزی نوێ وایان پیشاندا کە یاریزانە ئینگلیزیەکە گەڕاوەتەوە و دواتریش بەرانبەر ئارسیناڵ لە یارییە دۆستانەکەی بەرەبەیانی ئەمڕۆ بەشداریپێکرا، بەڵام نوێترین زانیاریی باس لەوە دەکات پاریس سان جێرمان رێککەوتنی سەرەتایی کردووە لەسەر ئەو یاریزانە.

زانیاریەکە کە تۆڕی هەواڵی سپۆرت زەونی فەڕەنسی بڵاویکردووەتەوە، باس لەوە دەکات پاریس و سانچۆ رێککەوتوون و مانچێستەر یونایتدیش داوای 60 ملیۆن یۆرۆ دەکات بۆ دەستلێبەردانی.

ئەو بڕەیەش واتا 25 ملیۆن کەمتر لە تێچووی گواستنەوەی لە ساڵی 2021 بۆ یانە ئینگلیزیەکە.