ڕازی شنێشل: سەرکەوتنمان بۆ ئۆڵۆمپیادی پاریس بە شایستەیی بوو
هەڵبژاردەی ژێر 23ساڵانی عێڕاق دوای سەرکەوتنی لە جامی ئاسیا بەرامبەر هەڵبژاردەی ئیندۆنیسیا بە فەرمی خۆی گەیاندە ئۆڵۆمپیادی پاریس کە ئەم هاوینە لە وڵاتی فەڕەنسا بەڕێوەدەچێت.
دوای تەواو بوونی یاریەکە ڕازی شنێشل ڕاهێنەری هەڵبژاردەی ئۆڵۆمپی عێڕاق لە کۆنگرەیەکی ڕۆژنامەوانیدا دەربارەی سەرکەوتنەکەیان ڕایگەیاند: گەیشتنمان بە ئۆڵۆمپیادی پاریس کارێکی ئاسان نەبوو، بە هەوڵ و ماندووبوونی سەرۆکی یەکێتی تۆپی پێی عێڕاق و سەرجەم یاریزانەکان بوو کە لە سەرجەم یارییەکاندا بە ورەیەکی بەرزەوە یاریان دەکرد و ئەوان لە شکستەکەی یاری تایلەندەوە وانەیەکی باش فێربوون، یاریەکەی ئیندۆنیسیاش ئاسان نەبوو تووشی زەحمەتیەکی زۆر بووینەوە بەڵام لە کۆتاییدا بە شایستەیی ئەو ئامانجەمان پێکا کە لە سەرەتاوە هەوڵمان بۆی دەدا ئەویش گەیشتن بوو بە ئۆڵۆمپیادی پاریس.
دەربارەی یاریزان عەلی جاسم کە ئاستێکی بەرزی لە پاڵەوانێتیەکە پێشکەش کرد و بە 4 گۆڵ تا ئێستا گۆڵکاری جامی ئاسیای ژێر23 ساڵانە، ڕازی شنێشل گوتی: سەرجەم هەڵبژاردەکان دەخوازن یاریزانێکی وەکو عەلی جاسمی هەبێت بۆ ئەوەی لە هەر کاتێکدا بێت ئەنجامی یاریەکەت بۆ بگۆڕێت، ئەو دەتوانێت جیاوازی دروست بکات و ڕۆڵی سەرەکی هەیە لە ئەنجامەکانی هەڵبژاردەکە.
هەڵبژاردەی ئۆڵۆمپی عێڕاق لە یارییەکانی ئۆڵۆمپیادی پاریس کەوتە کۆمەڵەی سێیەم و لەگەڵ هەریەک لە هەڵبژاردەکانی ئەرژەنتین و مەغریب و ئۆکڕانیا یاری دەکات.
